Беларусь: спыніць жорсткае абыходжанне з Марыяй Калеснікавай

12 June 2023, 5:56 PM
Беларусь: спыніць жорсткае абыходжанне з Марыяй Калеснікавай

Улады Беларусі павінны неадкладна спыніць практыку жорсткага абыходжання з Марыяй Калеснікавай і ўсімі іншымі палітычнымі зняволенымі, заявілі 24 міжнародныя і беларускія праваабарончыя арганізацыі. Нягледзячы на сур'ёзныя праблемы са здароўем, Калеснікаву ўтрымліваюць у адзіночнай камеры і не аказваюць ёй належнай медыцынскай дапамогі. Ёй таксама не дазваляюць атрымліваць перадачы з неабходнымі прадуктамі і медыкаментамі. 

У Калеснікавай не было ніякіх кантактаў ні з сям'ёй, ні з адвакатам ужо амаль чатыры месяцы. Вартыя даверу паведамленні пра тое, што ў калоніі яна падвяргаецца жорсткаму абыходжанню, а стан яе здароўя пагоршыўся, выклікаюць глыбокую заклапочанасць.

Знакавая фігура апазіцыі, музыка па асноўнай прафесіі, Калеснікава стала адным з сімвалаў мірнага пратэстнага руху за правы чалавека ў Беларусі. Яна знаходзіцца ў зняволенні з верасня 2020 года, пасля няўдалай спробы ўладаў сілай вытурыць яе з краіны ў адплату за яе палітычную актыўнасць і ўдзел у Каардынацыйнай радзе апазіцыі.

Паводле надуманых абвінавачванняў у "стварэнні экстрэмісцкага фармавання або ўдзеле ў ім", "змове з мэтай захопу ўлады", "закліках да дзеянняў, накіраваных на прычыненне шкоды нацыянальнай бяспецы" яе асудзілі 6 верасня 2021 года да 11 гадоў пазбаўлення волі. Калеснікава адбывае пакаранне ў жаночай папраўчай калоніі № 4 у Гомелі.

"Уначы 28 лістапада 2022 года Калеснікаву шпіталізавалі ў рэанімацыйнае аддзяленне Гомельскай бальніцы хуткай медыцынскай дапамогі, дзе ёй зрабілі аперацыю ў сувязі з прабадзеннем язвы. Непасрэдна перад шпіталізацыяй Калеснікава, нягледзячы на сур'ёзныя праблемы са здароўем, больш за 10 дзён утрымлівалася ў штрафным ізалятары — адзіночнай неацяпляемай камеры. Там было немагчыма спаць з-за холаду, яна ўвесь час хадзіла, каб сагрэцца", — гаворыцца ў заяве.

Хоць падчас знаходжання ў адзіночнай камеры Калеснікава неаднаразова губляла прытомнасць і пакутавала ад гіпертаніі і прыступаў млоснасці, улады адмаўляліся пераводзіць яе ў бальніцу да таго часу, пакуль яе стан не стаў крытычным.

Адміністрацыя папраўчай калоніі не паведаміла ні яе адвакату, ні яе сям'і пра тое, што Калеснікава была шпіталізаваная і перанесла аперацыю, хоць яна шмат разоў прасіла персанал бальніцы звязацца з яе сям'ёй.

У Гомельскай бальніцы хуткай дапамогі Калеснікава правяла каля тыдня, пасля чаго яе этапавалі ў медсанчастку калоніі. Падрабязнасці пра стан здароўя Калеснікавай і пра абыходжанне з ёй у штрафным ізалятары сталі вядомыя толькі 5 снежня, калі бацьку дазволілі спатканне з ёй.

Адміністрацыя калоніі 10 студзеня прымусіла Калеснікаву вярнуцца да працы на швейнай вытворчасці. Сям'я была занепакоеная ў сувязі з тым, што Калеснікава была яшчэ занадта слабая пасля аперацыі, каб вяртацца ў цэх.

З сярэдзіны лютага Калеснікавай адмаўляюць у любых кантактах з сям'ёй, уключаючы званкі, лісты і спатканні. Адвакат, нягледзячы на неаднаразовыя спробы, з 7 лютага не можа атрымаць да яе доступ.

У канцы сакавіка Праваабарончы цэнтр "Вясна" паведаміў, што Калеснікаву змясцілі ў памяшканне камернага тыпу (ПКТ) — дысцыплінарнае пакаранне, якое прадугледжвае строгі рэжым ізаляцыі, — за нібыта парушэнне правілаў унутранага распарадку.

З кастрычніка 2020 года па снежань 2022 года беларускія ўлады пазбавілі адвакацкай ліцэнзіі трох адвакатаў Калеснікавай: Аляксандра Пыльчанка, Людмілу Казак і Уладзіміра Пыльчанка. Палітычна матываванае пазбаўленне права займацца адвакацкай дзейнасцю ў дачыненні да абаронцаў палітвязняў — гэта распаўсюджаная рэпрэсіўная практыка ўладаў Беларусі.

У траўні праваабарончым арганізацыям стала вядома, што Калеснікава не аднавілася пасля аперацыі і яе стан у турме значна пагоршыўся. Паводле вартых даверу паведамленняў, яна была не ў сілах выконваць абавязковую працу ў калоніі і некалькі разоў губляла прытомнасць.

Занепакоеныя пагаршэннем стану Калеснікавай, сваякі пракансультавалася з лекарам, высветліўшы патрэбы ў пасляаперацыйнай рэабілітацыі. Хоць лекар не мог асабіста агледзець Калеснікаву, ён рэкамендаваў медычнае назіранне і спецыяльную дыету на працягу яшчэ некалькіх месяцаў пасля аперацыі, каб пазбегнуць рэцыдыву з патэнцыйна значна больш сур'ёзнымі наступствамі для здароўя.

Ізаляцыя палітвязняў і жорсткае абыходжанне з імі – шырока распаўсюджаная рэпрэсіўная тактыка ў Беларусі. У апошнія месяцы ўлады перашкаджалі зносінам з адвакатамі і сваякамі і іншым вядомым палітычным зняволеным, уключаючы Максіма Знака, Сяргея Ціханоўскага, Віктара Бабарыку, Мікалая Статкевіча і Ігара Лосіка.

Улады Беларусі павінны даць інфармацыю аб стане здароўя Калеснікавай, тэрмінова забяспечыць ёй доступ да лекараў па яе выбары, вярнуць ёй сувязь з сям'ёй і забяспечыць доступ да адваката, заявілі праваабарончыя групы. Неабходна спыніць палітычна матываваны крымінальны пераслед і вызваліць усіх тых, хто пазбаўлены волі выключна за рэалізацыю сваіх асноўных свабод.

Падпісанты:

Amnesty International;

ARTICLE 19;

Беларускі дом правоў чалавека імя Барыса Звозскага;

Беларуская асацыяцыя журналістаў; 

Беларускі Хельсінкскі камітэт;

Campax;

Freedom House;

Helsinki Foundation for Human Rights;

Human Constanta;

Праваабарончы цэнтр «Вясна»;

Human Rights Watch;

Міжнародная федэрацыя за правы чалавека (FIDH);

Міжнароднае партнёрства па правах чалавека (IPHR);

Lawtrend;

Прававая ініцыятыва – Беларусь;

Libereco – Partnership for Human Rights;

Нідэрландскі Хельсінкскі камітэт;

Нарвежскі Хельсінкскі камітэт;

Офіс па правахлюдзейзінваліднасцю;

PEN America;

Беларускi ПЭН;

People in Need;

Politzek.me;

Сусьветная арганізацыя супраць катаванняў. 

See more news

Заява праваабарончай супольнасці Беларусі з нагоды смерці палітвязня Ігара Ледніка
23 February 2024, 1:20 PM
Заява праваабарончай супольнасці Беларусі з нагоды смерці палітвязня Ігара Ледніка
Права на жыццё ў належнай ступені не ахоўваецца законам і не забяспечваецца на практыцы, што рэгулярна прыводзіць да трагедый.
Заява аб прызнанні шасці чалавек палітычнымі зняволенымі (Ульяна Яковіч і іншыя)
23 February 2024, 1:18 PM
Заява аб прызнанні шасці чалавек палітычнымі зняволенымі (Ульяна Яковіч і іншыя)
Мы патрабуем ад уладаў Беларусі неадкладна вызваліць Ульяну Яковіч, Аксану Ючкавіч, Дзмітрыя Халяўкіна, Сяргея Кульшу, Аляксандра Ільіна, Арцёма Закржэўскага і спыніць іх крымінальны пераслед.
Заява аб прызнанні сямі чалавек палітычнымі зняволенымі (Ірына Такарчук і іншыя)
23 February 2024, 1:13 PM
Заява аб прызнанні сямі чалавек палітычнымі зняволенымі (Ірына Такарчук і іншыя)
Мы патрабуем ад уладаў Беларусі неадкладна вызваліць палітвязняў Дзіяну Стульбу, Аляксандра Вароніна, Ірыну Такарчук, Наталлю Ладуцьку, Яўгенія Глушкова, Таццяну Сцепу, Аляксея Швяцова.
Заява праваабаронцаў аб прызнанні 12 чалавек палітычнымі зняволенымі (Артур Голубеў і іншыя)
06 February 2024, 6:57 PM
Заява праваабаронцаў аб прызнанні 12 чалавек палітычнымі зняволенымі (Артур Голубеў і іншыя)
Мы патрабуем ад уладаў Беларусі неадкладна вызваліць палітвязняў Артура Голубева, Арцёма Антонава, Алега Зыкуна, Максіма Каранькова, Андрэя Ломшу, Вячаслава Панасюка, Аляксандра Скварцова, Міхаіла Чумакова, Руслан Шукалу, Філіпа Залескага, Вераніку Казак, Генадзя Жукеля і спыніцьіх крымінальны пераслед.

Атрымаць падтрымку

Мы б хацелі пачуць, як Беларускі Дом правоў чалавека можа падтрымаць вашу арганізацыю.

Аказаць падтрымку

Дому правоў чалавека імя Барыса Звозскава і яго дзейнасці