Пасляадукацыйная дзейнасць (Follow-up)

СУСТРЭЧЫ ВЫПУСКНІКОЎ

Выпускнікі ўсіх цыклаў праекта BISH, а таксама каманда BISH і эксперты збіраюцца на рэгулярныя сустрэчы. На такіх сустрэчах выпускнікі камунікуюць міжсобку, абмяркоўваюць актуальныя задачы і шукаюць іх рашэнне.

Сустрэчы выпускнікоў адбываюцца прыкладна раз на два месяцы. Яны праходзяць не толькі ў Мінску, але і іншых гарадах Беларусі. Сустрэчы ў рэгіёнах актыўна дапамагаюць арганізоўваць самі выпускнікі: распаўсюджваюць анонс, шукаюць памяшканне, арганізуюць побыт удзельнікаў.

Кожная сустрэча прысвечаная абмеркаванню адной тэмы; тэма абіраецца з улікам актуальных патрэбаў выпускнікоў і праваабарончай супольнасці ў цэлым. Экспертамі на сустрэчах выступаюць прадстаўнікі праваабарончых і іншых арганізацый, сябры каманды праграмы ILIA-By, самі выпускнікі.

Сустрэчы выпускнікоў дазваляюць развіваць стратэгіі імплементацыі рашэнняў дагаварных органаў ААН, прымяняць агульны падыход у працы з міжнароднымі праваабарончымі механізмамі, прасоўваць іншыя праваабарончыя ініцыятывы і проста больш ведаць аб дзейнасці супольнасці і кансалідаваць яе.

Калі вы - выпускнік праекта BISH і жадаеце прапанаваць тэму для сустрэчы выпускнікоў або зладзіць сустрэчу ў сваім горадзе - калі ласка, звяжыцеся з камандай BISH праз форму на старонцы ніжэй або па пошце: ilia.belarus@humanrightshouse.org .

СТАЖЫРОЎКІ

Стажыроўка ў межах праекта Follow-up уяўляе з сябе работу выпускніка BISH у праваабарончай арганізацыі пад кіраўніцтвам куратара; пры гэтым выпускнік атрымлівае практычны досвед, прымяняючы атрыманыя ў праграме веды да канкрэтных кейсаў; а арганізацыя, у якой выпускнік праходзіць стажыроўку, атрымлівае патэнцыйнага кампетэнтнага супрацоўніка з добрай тэарэтычнай і практычнай падрыхтоўкай.

Мэта такіх стажыровак - стварыць кадравы рэзерв з патэнцыйных супрацоўнікаў для праваабарончых арганізацый Беларусі і стварыць выпускнікам магчымасці для працаўладкавання. Усё гэта падвышае агульны ўзровень кампетэнцый праваабарончай супольнасці Беларусі.

Стажыроўка, як правіла, працягваецца тры месяцы. Праграма ILIA-By бярэ на сябе забеспячэнне выдаткаў на стажыроўку для абодвух бакоў.

Выпускнік BISH можа прайсці стажыроўку не толькі ў класічнай праваабарончай арганізацыі, але і ў тых арганізацыях, у дзейнасці якіх ёсць праваабарончы кампанент (абарона экалагічных правоў, правоў жанчын, дзяцей, людзей з інваліднасцю, людзей з ВІЧ, і т.д.)

Конкурсы стажыровак праходзяць у сярэднім раз на год. Калі вы - выпускнік ILIA-By, вы атрымаеце паведамленне аб чарговым конкурсе па пошце.

КОНКУРСЫ МІНІ-ПРАЕКТАЎ

Для выпускнікоў ILIA-By рэгулярна праходзяць конкурсы міні-праектаў.

Галоўная задача конкурса міні-праектаў - фінансавая падтрымка ініцыятываў выпускнікоў, каб у перспектыве садзейнічаць імплементацыі міжнародных стандартаў права правоў чалавека ў нацыянальную практыку і забяспечыць лепшую абарону праваабаронцам і ахвярам парушэння правоў чалавека.

Мэта конкурса міні-праектаў - кансалідацыя праваабарончай супольнасці, каб разам прасоўваць каштоўнасці правоў чалавека, каб павялічыць эфектыўнасць выканання міжнародных абавязкаў Беларусі ў сферы правоў і свабодаў на нацыянальным узроўні.

Міні-праекты выпускнікоў могуць быць скіраваныя на рашэнне такіх задач:

• забеспячэнне лепшай абароны ахвяраў парушэнняў правоў чалавека з выкарыстаннем нацыянальных і міжнародных механізмаў абароны;

• асветніцкія, адукацыйныя і іншыя дзеянні для прасоўвання каштоўнасцяў правоў чалавека, перадачы ведаў і навыкаў абароны правоў чалавека;

• умацаванне супольнасці праваабаронцаў, адвакатаў, юрыстаў і сувязяў паміж імі;

• прасоўванне стандартаў правоў чалавека праз інфармаванне прадстаўнікоў судовай і іншых галінаў улады аб неабходнасці і важнасці прымянення нацыянальнага заканадаўства праз прызму міжнароднага права правоў чалавека.

Конкурсы міні-праектаў адбываюцца ў сярэднім два разы на год. Калі вы - выпускнік ILIA-By, вы атрымаеце паведамленне аб чарговым конкурсе па пошце.

ВЫДАВЕЦКАЯ І АНАЛІТЫЧНАЯ ДЗЕЙНАСЦЬ

У межах ILIA-By выдаюцца навучальныя дапаможнікі і навуковыя зборнікі. Матэрыялы для іх рыхтуюць удзельнікі, выпускнікі і эксперты праекта BISH.

Выдадзеныя зборнікі:

• «Свобода выражения мнения, собраний, и объединений: международно-правовые стандарты и законодательство в Республике Беларусь». Мінск, Тэсэй, 2006.

• «Примеры индивидуальных обращений в Комитет по правам человека, в Конституционный Суд Республики Беларусь, статьи и эссе участников программы «Имплементация де-факто международных обязательств Республики Беларусь». Нормативно-практическое издание. Руководство для юристов. Vilnius, Human Rights House, 2008.

• «Права человека: международное право и национальное законодательство». Научное издание. Вільнюс, 2011.

• «Индивид v. государство: практика обращения в договорные органы ООН применительно к Республике Беларусь». Научное издание. Том 1 - Вільнюс, 2012. Том 2 – Вільнюс, 2013.

• «Де–факто имплементация международных стандартов прав человека: опыт выпускников программы ILIA в Беларуси». Научное издание. Вільнюс, 2015.

• «Права человека: как включать права человека в отдельные юридические дисциплины». Мінск, 2020

СУСТРЭЧА ВЫПУСКНІКОЎ У ФАРМАЦЕ ТОК-ШОЎ

Акрамя стандартнай сустрэчы толькі для выпускнікоў, праграма ILIA-By ладзіць і адкрытыя сустрэчы ў фармаце ток-шоў, на якія запрашаюцца ўсе ахвочыя.

Адкрытае ток-шоў - гэта сродак прасоўвання стандартаў правоў чалавека. Яго задача - праз актуальную тэму, якая выклікае гарачае абмеркаванне ў грамадстве, заахвоціць гледачоў да эмацыйнай дыскусіі і такім чынам зацікавіць правамі чалавека больш шырокую аўдыторыю.

Спікерамі на ток-шоў выступаюць у тым ліку і выпускнікі праграмы ILIA-By.

Мы зладзілі ўжо тры сустрэчы выпускнікоў у фармаце ток-шоў:

• "Каго і як праваабаронцы прызнаюць палітвязнямі. На прыкладзе "справы Рэгнума". Май 2018 года

• "Без права на "Я". Як пазбаўляюць асобы людзей з інваліднасцю". Май 2019 года

• "Валанцёры з ByCOVID19. Гэта ўвогуле законна?" Чэрвень 2020 года