Падрыхтаваны дапаможнік па працы з Камітэтам па ліквідацыі дыскрымінацыі ў дачыненні да жанчынаў

Падрыхтаваны дапаможнік па працы з Камітэтам па ліквідацыі дыскрымінацыі ў дачыненні да жанчынаў.

Аўтаркі Дапаможніка – выпускніцы адукацыйнай праграмы ILIA-By Беларускага дома правоў чалавека імя Барыса Звозскава Таццяна Лішанкова і Вераніка Якаўлева.

Дапаможнік прысвечаны пытанням зваротаў у Камітэт па ліквідацыі дыскрымінацыі ў дачыненні да жанчынаў.

Мэта дапаможніка – дапамога юрыстам, адвакатам, праваабаронцам і актывістам эфектыўна выкарыстоўваць механізм падачы індывідуальных паведамленняў у Камітэт.

КЛДЖ адыгрывае ключавую ролю ў забеспячэнні выканання дзяржавамі абавязацельстваў па Канвенцыі аб ліквідацыі ўсіх формаў дыскрымінацыі ў дачыненні да жанчынаў. Камітэт разглядае індывідуальныя паведамленні, даследуе абставіны канкрэтных спраў і прымае меркаванні, якія не толькі дапамагаюць аднавіць правы заяўнікаў, але і фармуюць прэцэдэнты для будучых зваротаў.

Аналіз гэтых меркаванняў дазваляе лепш зразумець, якія аргументы дапамагаюць найбольш пераканаўча абгрунтаваць парушэнні правоў у межах Канвенцыі.

Пасля дэнансацыі Беларуссю Факультатыўнага пратакола да Міжнароднага пакта аб грамадзянскіх і палітычных правах КЛДЖ застаецца адзіным дагаворным органам ААН, у які можна падаваць індывідуальныя паведамленні аб парушэннях правоў чалавека Рэспублікай Беларусь.

Дапаможнік складаецца з дзвюх асноўных частак.

У першай частцы разглядаюцца пытанні прымальнасці індывідуальных паведамленняў. Тут падрабязна тлумачыцца, як Камітэт ацэньвае магчымасць прыняцця справы да разгляду, і прыводзяцца прыклады, калі паведамленні прызнаваліся непрымальнымі, напрыклад, з-за невыканання патрабавання аб вычарпанні ўнутраных сродкаў прававой абароны, адсутнасці сувязі (несумяшчальнасці) з палажэннямі Канвенцыі або недастатковасці абгрунтаванняў.

Другая частка прысвечана аналізу справаў, разгляданых Камітэтам. Аўтаркі гэтага дапаможніка вывучылі практыку КЛДЖ (148 справаў) і класіфікавалі вынесеныя Камітэтам меркаванні па розных тэматыках. У дапаможніку адлюстраваныя тэмы, якія здаліся аўтаркам найбольш цікавымі, актуальнымі і прымяняльнымі для патэнцыйных скаргаў з улікам беларускага кантэксту. У прыватнасці, у другой частцы дапаможніка прэзэнтаваныя справы, звязаныя з згвалтаваннем, хатнім гвалтам, гандлем людзьмі, парушэннямі правоў ЛГБТК+ жанчын, умовамі ўтрымання ў месцах несвабоды, высылкамі.

У канцы дапаможніка прыводзіцца спіс паведамленняў, пададзеных у КЛДЖ, іх тэматыка і прынятыя па іх рашэнні.

Аўтаркі спадзяюцца, што гэты дапаможнік будзе карысным і дапаможа лепш знацца на практыцы КЛДЖ, а таксама натхніць на актыўнае выкарыстанне механізмаў Камітэта.

“Мы верым, што дзякуючы нашай працы колькасць якасна падрыхтаваных паведамленняў павялічыцца, што прывядзе да большай колькасці паспяховых справаў, стварэння важных прэцэдэнтаў і, у выніку, умацавання правоў жанчынаў” – адзначаюць Таццяна Лішанкова і Вераніка Якаўлева ў прэамуле Дапаможніка.

СПАМПАВАЦЬ ДАПАМОЖНІК ПА СПАСЫЛЦЫ (PDF)