Заява аб прызнанні 10 чалавек палітычнымі зняволенымі (Зміцер Шалак і іншыя)

На фота: Зміцер Шалак

заява прадстаўнікоў беларускай праваабарончай супольнасці

21 жніўня2024 г.

У сувязі з павелічэннем колькасці выпадкаў асуджэння і пазбаўлення волі грамадзянаў краіны па шэрагу дыфамацыйных артыкулаў Крымінальнага кодэкса Рэспублікі Беларусь, а таксама ў сувязі са знявагай дзяржаўных сімвалаў Рэспублікі Беларусь ды і іншымі дзеяннямі, накіраванымі на правамерную реалізацыю свабоды выказвання меркаванняў, мы, прадстаўнікі беларускай праваабарончай супольнасці патрабуем спыніць пераслед правамерных форм выказвання меркаванняў, і ў  чарговы раз пацвярджаючы свае неаднаразова выказаныя патрабаванні па дэкрыміналізацыі дыфамацыі і недапушчальнасці пазбаўлення волі грамадзян за абразу службовых асобаў, дзяржавы, дзяржаўных органаў і сімвалаў (супольная заява ад 22 снежня 2020 г.),  адзначаем наступнае:

Намі атрыманая інфармацыя пра наступных асобаў, пазбаўленых волі за абразу А.Лукашэнка, прадстаўнікоў улады (супрацоўнікаў міліцыі), суддзяў і знявагу дзяржаўных сімвалаў:

1. Міхаіл Лазько асуджаны па арт. 369 КК за абразу прадстаўніка ўлады да пазбаўлення волі ў папраўчай калоніі;

2. Максім Джуманіязаў асуджаны арт. 368 і 369 КК за абразу Аляксандра Лукашэнкі і прадстаўніка ўлады да пазбаўлення волі ў папраўчай калоніі;

3. Дзмітрый Шалак асуджаны па арт. 368 і 369 КК за абразу Аляксандра Лукашэнкі і прадстаўніка ўлады да трох гадоў і 6 месяцаў пазбаўлення волі ў папраўчай калоніі;

4. Павел Кучарэнка асуджаны па арт. 203-1 КК за перадачу асабістых дадзеных да пазбаўлення волі ў папраўчай калоніі;

5. Андрэй Гіль асуджаны па арт. 369 КК за абразу прадстаўніка ўлады да двух гадоў пазбаўлення волі ў папраўчай калоніі;

6. Ярванд Марцірасян асуджаны па арт. 368 КК за абразу Аляксандра Лукашэнкі да двух гадоў пазбаўлення волі ў папраўчай калоніі;

7. Сяргей Барзавец асуджаны па арт. 368 КК за абразу Аляксандра Лукашэнкі да пазбаўлення волі ў папраўчай калоніі;

8. Яўген Стральчэнь асуджаны па арт. 342 і 367 КК за ўдзел у вулічных пратэстах і паклёп у дачыненні да А. Лукашэнкі.

Таксама ёсць інфармцыя аб замене абмежавання волі пазбаўленнем волі у дачыненні да

9. Сяргея Чарнецкага, які быў асуджаны па арт. 391 КК за абразу суддзі,

10. Станіслава Амельянюка, які быў асуджаны па арт. 370 КК за знявагу дзяржаўных сімвалаў.

У сувязі з гэтым мы лічым пераслед і пазбаўленне волі названых асоб палітычна матываваным, звязаным з мірнай рэалізацыяй выказвання меркавання, а іх саміх палітычнымі зняволенымі ў адпаведнасці з п. 3.1(а) Кіраўніцтва па вызначэнні паняцця “Палітычны зняволены”, і патрабуем ад уладаў Беларусі:

1. Неадкладна вызваліць палітвязняў Міхаіла Лазько, Максіма Джуманіязава, Дзмітрыя Шалака, Паўла Кучарэнку, Андрэя Гіля, Ярванда Марцірасяна, Сяргея Барзаўца, Яўгена Стральчэня, Сяргея Чарнецкага, Станіслава Амельянюка і спыніць крымінальны пераслед у дачыненні да іх.

2. Прыняць захады, скіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асобаў, а менавіта – арт. 188, 367, 368, 369, 369-1, 370, 391 Крымінальнага кодэкса Рэспублікі Беларусь, і спыніць усе раней узбуджаныя па дадзеных артыкулах крымінальныя справы.

3. Неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.

Праваабарончы цэнтр "Вясна";

Беларускі ПЭН;

Беларуская асацыяцыя журналістаў;

Lawtrend;

Прававая ініцыятыва;

Беларускі дом правоў чалавека імя Барыса Звозскава.