Праваабаронцы заклікаюць не затрымліваць мірных грамадзян, не ўжываць супраць іх сілу і спецсродкі

10 August 2020, 2:33 AM
Праваабаронцы заклікаюць не затрымліваць мірных грамадзян, не ўжываць супраць іх сілу і спецсродкі

Сумесная заява праваабарончых арганізацый Беларусі

Мінск, 10.08.2020

Мы, прадстаўнікі беларускіх праваабарончых арганізацый, выказваем рашучы пратэст у сувязі з дзеяннямі сілавых структур у дачыненні да мірных дэманстрантаў.

Права выказаць меркаванне на мірных сходах з’яўляецца адным з найважнейшых правоў чалавека. У Беларусі няма эфектыўных механізмаў для рэалізацыі права на мірныя сходы, няма сумленных і свабодных выбараў, эфектыўнай працэдуры абскарджання парушаных правоў. Адзінай магчымасцю выказаць пратэст з’яўляюцца мітынгі і дэманстрацыі.

Выхад людзей на вуліцы беларускіх гарадоў быў выкліканы выключна нязгодай з дзеяннямі ўладаў падчас выбарчай кампаніі па выбарах Прэзідэнта Рэспублікі Беларусь, якая з самага пачатку праходзіла ў атмасферы страху і запалохвання.

Мы асуджаем непрапарцыйнае прымяненне сілы супрацоўнікамі праваахоўных органаў 9 і 10 жніўня, выкарыстанне спецыяльных сродкаў у адносінах да мірных дэманстрантаў.

Мы ўскладаем на ўладу і праваахоўныя органы ўсю адказнасць за тое, што адбылося. Адначасова мы заклікаем да больш хуткай дээскалацыі канфлікту.

Мы хочам яшчэ раз падкрэсліць, што выкарыстанне сілы, разгон сходаў і затрыманне іх удзельнікаў без разумнага абгрунтавання з’яўляецца недапушчальным абмежаваннем права на мірныя сходы і правы на выказванне меркавання.

Адзначаем, што любы гвалт немінуча прыводзіць да зваротнай рэакцыі, якая можа быць непрадказальнай і некантраляванай. У сувязі з гэтым мы ў чарговы раз заклікаем супрацоўнікаў міліцыі, вайскоўцаў і супрацоўнікаў іншых органаў і падраздзяленняў, якія былі задзейнічаныя ў разгонах мірных дэманстрацый, да стрыманасці і непрымянення гвалту і зброі.

Мы заклікаем спыніць затрымліваць, ужываць сілу і спецсродкі да людзей, якія выходзяць на вуліцы гарадоў для мірнага выказвання пратэсту.

Звяртаем увагу, што ў тых беларускіх гарадах, дзе супрацоўнікі праваахоўных органаў адмовіліся ад прымянення гвалту да мірных пратэстоўцаў, дэманстрацыі і выступленні людзей прайшлі мірна.

Мы занепакоеныя паведамленнямі аб як мінімум адной ахвяры начных сутыкненняў, а таксама аб сур’ёзных траўмах, прычыненых мірным грамадзянам светла-шумавымі гранатамі і гумовымі кулямі, якія без важкіх падстаў выкарыстоўваліся на вуліцах Мінска і іншых гарадоў. У сувязі з гэтым мы патрабуем праваахоўныя органы адмовіцца ад падобнай практыкі.

Мы таксама заклікаем органы аховы здароўя і медыкаў даць поўную і дакладную інфармацыю аб колькасці ахвяр і пацярпелых у сутыкненнях і ў далейшым інфармаваць пра гэта грамадскасць і СМІ. Нагадваем пра тое, што ў адпаведнасці з арт. 34 Канстытуцыі Рэспублікі Беларусь грамадзянам гарантуецца права на атрыманне поўнай, дакладнай і своечасовай інфармацыі аб дзейнасці дзяржаўных органаў.

Хочам нагадаць, што падчас крызіснай сітуацыі, звязанай з пандэміяй COVID-19, валанцёры з ліку звычайных грамадзян аператыўна аказалі неабходную дапамогу беларускім медыкам у забеспячэнні іх сродкамі індывідуальнай абароны.

Мы патрабуем ад следчых органаў і органаў пракуратуры аб’ектыўнага і бесстаронняга расследавання ўсіх фактаў прымянення сілы і спецыяльных сродкаў у дачыненні да мірных дэманстрантаў, а таксама прычын і ўмоў, якія прывялі да таго, што здарылася.

І, нарэшце, мы звяртаемся да шараговых супрацоўнікаў праваахоўных органаў з заклікам адмовіцца ад выканання загадзя злачынных загадаў і распараджэнняў па ўжыванні непрапарцыйнай сілы да мірных дэманстрантаў.

See more news

Патрабуем неадкладнага перагляду прысудаў і вызвалення чацвярых палітычных зняволеных (Уладзімір Жук і іншыя)
15 September 2021, 8:50 AM
Патрабуем неадкладнага перагляду прысудаў і вызвалення чацвярых палітычных зняволеных (Уладзімір Жук і іншыя)
Мы прызнаём палітвязнямі Уладзіміра Жука, Аляксея Шчытнікава, Аляксандра Зайкоўскага, Арцёма Саковіча.
Заява праваабарончых арганізацый Беларусі аб прызнанні шасці новых палітвязняў (Аляксей Мінаў і іншыя)
13 September 2021, 3:04 PM
Заява праваабарончых арганізацый Беларусі аб прызнанні шасці новых палітвязняў (Аляксей Мінаў і іншыя)
Мы патрабуем ад уладаў Беларусі неадкладна вызваліць з-пад варты палітвязняў Аляксея Мінава, Глеба Койпіша, Аляксея Муравіцкага, Максіма Клімовіча, Дар’ю Чайко, Кірыла Пальчэўскага і спыніць іх крымінальны пераслед.
Заява праваабарончых арганізацый Беларусі аб прызнанні дваіх палітзняволеных (Раман Марозаў і Вячаслаў Кандыба)
06 September 2021, 7:58 PM
Заява праваабарончых арганізацый Беларусі аб прызнанні дваіх палітзняволеных (Раман Марозаў і Вячаслаў Кандыба)
Мы, прадстаўнікі беларускай праваабарончай супольнасці, заяўляем, што пераслед Вячаслава Кандыбы і Рамана Марозава з'яўляецца палітычна матываваным, а яны самі — палітычнымі зняволенымі.
Заява праваабарончых арганізацый Беларусі аб прызнанні сямі новых палітвязняў (Арцём Салавей і іншыя)
31 August 2021, 1:16 PM
Заява праваабарончых арганізацый Беларусі аб прызнанні сямі новых палітвязняў (Арцём Салавей і іншыя)
Мы патрабуем ад уладаў Беларусі неадкладна вызваліць з-пад варты палітвязняў Андрэя Лінніка, Кірыла Чарткова, Арцёма Салаўя, Дзмітрыя Скрэтуцкага, Андрэя Аніскевіча, Іллю Палхоўскага, Юрыя Сянькова і спыніць іх крымінальны пераслед.

Атрымаць падтрымку

Мы б хацелі пачуць, як Беларускі Дом правоў чалавека можа падтрымаць вашу арганізацыю.

Аказаць падтрымку

Дому правоў чалавека імя Барыса Звозскава і яго дзейнасці