Заява аб прызнанні 10 чалавек палітычнымі зняволенымі (Алена Добыш і іншыя)

Заява праваабарончай супольнасці Беларусі

22 красавіка 2025 года

Мы, прадстаўнікі праваабарончай супольнасці Беларусі, зноў падкрэсліваем, што пазбаўленне волі і крымінальная адказнасць выкарыстоўваюцца ўладамі для падаўлення грамадскай і палітычнай актыўнасці, іншадумства, салідарнасці і антываенных выступленняў.

Крымінальнае заканадаўства ў 2021 годзе было істотна ўзмоцнена і дапоўнена новымі складамі злачынстваў так званага «экстрэмісцкага» характару, якія выкарыстоўваюцца ўладамі выключна ў мэтах палітычных рэпрэсій.

МУС і КДБ у пазасудовым парадку адвольна прызнаюць экстрэмісцкімі групы грамадзян, аб’яднаных грамадскімі ці палітычнымі інтарэсамі, што крытыкуюць дзеянні ўлады і патрабуюць зменаў у дзяржаве і яе палітыцы. Таксама экстрэмісцкімі фарміраваннямі прызнаныя некаторыя СМІ. Гэта, у сваю чаргу, адкрывае шлях да адвольнага прыцягнення да крымінальнай адказнасці тых, хто ўдзельнічае ў дзейнасці такіх групаў або іншым чынам падтрымлівае яе, і да пазбаўлення іх волі як непрапарцыйнай меры абмежавання права на асацыяцыю і свабоду выказвання меркаванняў.

Так, нам стала вядома пра ўзяцце пад варту і асуджэнне да пазбаўлення волі па артыкулах 361-1, 361-2, 361-4 Крымінальнага кодэкса наступных асобаў:
Алены Добыш, Максіма Акулава, Дзмітрыя Хамянкова, Ігара Гольцава, Аляксея Пераверзева, Васіля Арэшкі, Веры Кананенкі, Сяргея Кардаша, Аляксандра Рыбалкі, Міхаіла Нязнанава.

Пазбаўленне волі названых асобаў з'яўляецца адвольным і палітычна матываваным.

Мы прызнаём гэтых людзей палітвязнямі ў адпаведнасці з п. 3.1(а) Кіраўніцтва па вызначэнні паняцця "палітычны зняволены", і патрабуем ад уладаў Беларусі:

• неадкладна вызваліць палітвязняў: Алену Добыш, Максіма Акулава, Дзмітрыя Хамянкова, Ігара Гольцава, Аляксея Пераверзева, Васіля Арэшку, Веру Кананенку, Міхаіла Нязнанава, Сяргея Кардаша, Аляксандра Рыбалку;

• неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.

Праваабарончы цэнтр "Вясна";

Прававая ініцыятыва; 

Lawtrend;

Human Constanta;

Беларускі дом правоў чалавека імя Барыса Звозскава;

Беларускі ПЭН;

Беларускі Хельсінкскі камітэт.