Заява праваабарончых арганізацый аб нападзе на грамадзянскую супольнасць Беларусі і аб прызнанні затрыманых палітвязнямі

15 July 2021, 11:33 AM
Заява праваабарончых арганізацый аб нападзе на грамадзянскую супольнасць Беларусі і аб прызнанні затрыманых палітвязнямі

14 ліпеня 2021 года адбылася чарговая атака на грамадзянскую супольнасць: па ўсёй Беларусі прайшлі ператрусы, допыты і затрыманні праваабаронцаў, журналістаў, грамадскіх актывістаў, сябраў некамерцыйных арганізацый.

Ператрусы прайшлі ў офісах Праваабарончага цэнтру «Вясна», Беларускай асацыяцыі журналістаў, грамадскай арганізацыі «Імёны», Цэнтра прававой трансфармацыі «Lawtrend», «Руха «За свабоду!», Згуртавання беларусаў свету «Бацькаўшчына», Цэнтра эканамічных даследванняў BEROC, арганізацыі «Гендэрныя ініцыятывы», праваабарончай арганізацыі «Беларускі Хельсінкскі камітэт», Беларускага ПЭН-Цэнтру,  грамадскай арганізацыі “Саюз беларускіх пісьменнікаў”, БНФ, АГП, на пляцоўцы «Тэрыторыя правоў».

Пасля ператрусаў па ўсёй Беларусі былі затрыманыя праваабаронцы і актывісты: 

1.       Уладзімір Лабковіч, юрыст «Вясны»

2.       Ніна Лабковіч, дырэктарка аб'яднання інвестараў Angels Band

3.       Валянцін Стэфановіч, сябра Рады «Вясны»

4.       Алесь Бяляцкі, кіраўнік «Вясны»

5.       Сяргей Сыс, журналіст і праваабаронца

6.       Алена Лапцёнак, праваабаронца «Вясны»

7.       Андрэй Палуда, праваабаронца «Вясны»

8.       Яўгенія Бабаева, праваабаронца

9.       Віктар Сазонаў, праваабаронца «Вясны»

10.   Марына Статкевіч, былая сябра «Вясны»

11.   Аляксандр Харытон

12.   Мікола Шарах, кіраўнік ячэйкі свабоднага прафсаюза з Полацка

13.   Сяргей Мацкевіч, Цэнтр Супольнасць

Відавочна, што матывам іх пераследу ёсць праваабарончая і грамадская дзейнасць: прасоўванне міжнародных стандартаў правоў чалавека і дэмакратычных каштоўнасцяў, дзеянні ў абарону права на жыццё, свабоду слова, мірных сходаў і асацыяцыі, права на справядлівы суд і свабоду ад катаванняў.

На падставе гэтага мы лічым іх пераслед і пазбаўленне волі палітычна матываваным, звязаным з іх негвалтоўнай дзейнасцю, накіраванай на абарону правоў чалавека і асноўных свабод, а іх саміх - палітычнымі зняволенымі ў адпаведнасці з п. 3.1(b) Кіраўніцтва па вызначэнні паняцця “Палітычны зняволены”,

Пераслед грамадзянскай супольнасці Беларусі, ад жніўня 2020 года і да сёння, набыў беспрэцэдэнтны маштаб. Такіх масавых рэпрэсій Беларусь не бачыла ад моманту набыцця незалежнасці. На дзень падпісання заявы ў Беларусі прызнаныя палітвязнямі больш за 500 чалавек, прынамсі 1500 знаходзяцца ў турмах і тысячы людзей – пад следствам па палітычна матываваных абвінавачваннях. Цягам году, ад жніўся 2020, амаль 40 000 чалавек былі незаконна затрыманыя і пацярпелі ад катаванняў. Галоўныя незалежныя СМІ заблакаваныя.

Рэпрэсіі такога маштабу скіраваныя на знішчэнне не толькі праваабарончых і некамерцыйных арганізацый, але і любых праяваў грамадскай актыўнасці ў Беларусі.

Рэальнасць гэтай пагрозы пацвярджаюць словы міністра замежных справаў Беларусі Уладзіміра Макея, які абвясціў перспектыву знішчэння грамадзянскай супольнасці у выпадку ўзмацнення санкцый, заява намесніка начальніка следчага ўпраўлення КДБ аб тым, што «ў Беларусі ідзе аперацыя зачысткі ад радыкальна настроеных асобаў», і ўрэшце заява Аляксандра Лукашэнкі аб правядзенні «маштабнай антытэрарыстычнай аперацыі».

Беларуская праваабарончая супольнасць рашуча выступае супраць чарговай хвалі бесперарыўных рэпрэсій супраць грамадзянскай супольнасці Беларусі. Нягледзячы на нечуваны ціск, нашы арганізацыі працягнуць прасоўванне правоў чалавека ў Беларусі. 

Мы патрабуем ад уладаў Беларусі неадкладна вызваліць вышэйзгаданых палітвязняў   і спыніць іх крымінальны пераслед, спыніць рэпрэсіі і вызваліць усіх палітычных вязняў.

Мы заклікаем міжнародныя арганізацыі і праваабаронцаў усіх краін выказаць рашучы пратэст супраць грубых парушэнняў правоў чалавека ў Беларусі і патрабаваць ад уладаў сваіх краін настойваць на неадкладным вызваленні ўсіх беларускіх палітвязняў.


Праваабарончы цэнтр "Вясна";

Беларускі Хельсінкскі камітэт;

ГА “Беларуская ассацыяцыя журналістаў”;

Беларускі ПЭН-цэнтр;

РГА "Прававая ініцыятыва”;

Беларускі дакументацыйны цэнтр;

Беларускі дом правоў чалавека імя Барыса Звозскава;

Human Constanta.

See more news

Заява праваабарончых арганізацый Беларусі аб прызнанні дзевяці новых палітвязняў (Дзмітры Таратун і іншыя)
17 September 2021, 5:54 PM
Заява праваабарончых арганізацый Беларусі аб прызнанні дзевяці новых палітвязняў (Дзмітры Таратун і іншыя)
Мы патрабуем ад уладаў Беларусі неадкладна вызваліць палітвязняў Дзмітрыя Таратуна, Ірыну Вікхольм, Андрэя Астрацова, Арцёма Сокала, Канстанціна Дудзікава, Арцёма Шалегіна, Аляксея Алікіна, Яўгена Пятрова, Уладзіміра Кузуба і спыніць іх крымінальны пераслед.
Заява праваабарончых арганізацый Беларусі аб прызнанні сямі новых палітвязняў (Аляксей Салдаткін і іншыя)
16 September 2021, 7:48 PM
Заява праваабарончых арганізацый Беларусі аб прызнанні сямі новых палітвязняў (Аляксей Салдаткін і іншыя)
Мы патрабуем ад уладаў Беларусі неадкладна вызваліць з-пад варты Аляксея Салдаткіна, Віктара Фенчука, Аляксандра Багданава, Максіма Крука, Кірыла Волаха, Алега Караля, Мікалая Папеку і спыніць іх крымінальны пераслед.
Патрабуем неадкладнага перагляду прысудаў і вызвалення чацвярых палітычных зняволеных (Уладзімір Жук і іншыя)
15 September 2021, 8:50 AM
Патрабуем неадкладнага перагляду прысудаў і вызвалення чацвярых палітычных зняволеных (Уладзімір Жук і іншыя)
Мы прызнаём палітвязнямі Уладзіміра Жука, Аляксея Шчытнікава, Аляксандра Зайкоўскага, Арцёма Саковіча.
Заява праваабарончых арганізацый Беларусі аб прызнанні шасці новых палітвязняў (Аляксей Мінаў і іншыя)
13 September 2021, 3:04 PM
Заява праваабарончых арганізацый Беларусі аб прызнанні шасці новых палітвязняў (Аляксей Мінаў і іншыя)
Мы патрабуем ад уладаў Беларусі неадкладна вызваліць з-пад варты палітвязняў Аляксея Мінава, Глеба Койпіша, Аляксея Муравіцкага, Максіма Клімовіча, Дар’ю Чайко, Кірыла Пальчэўскага і спыніць іх крымінальны пераслед.

Атрымаць падтрымку

Мы б хацелі пачуць, як Беларускі Дом правоў чалавека можа падтрымаць вашу арганізацыю.

Аказаць падтрымку

Дому правоў чалавека імя Барыса Звозскава і яго дзейнасці