Набор на адукацыйны курс па асновах мэнэджмента арганізацый грамадзянскай супольнасці

Беларускі дом правоў чалавека імя Барыса Звозскава абвяшчае набор удзельнікаў і ўдзельніц на адукацыйны курс па асновах мэнэджмента арганізацый грамадзянскай супольнасці, які пройдзе ў лістападзе 2022 – сакавіку 2023 г.

Гэты курс аб тым, як кіраваць грамадскімі арганізацыямі і ініцыятывамі, – вызначаць мэты, планаваць праекты, матываваць каманду і забяспечыць яе эфектыўную працу, ацэньваць эфектыўнасць дзейнасці і падвышаць устойлівасць.

Курс будзе складацца з:

• самастойнага вывучэння ўдзельнікамі і ўдзельніцамі матэрыялаў на анлайн-платформе;

• групавых анлайн-заняткаў з экспертамі і эксперткамі курса працягласцю 2-3 гадзіны;

• выканання практычных заданняў з атрыманнем зваротнай сувязі;

• двух афлайн трохдзённых трэнінгаў у снежні 2022 і сакавіку 2023 г. Плануецца, што трэнінг у снежні пройдуць ў Грузіі, у сакавіку – у Літве.

Удзельнікі і ўдзельніцы курса падвысяць свае веды і ўменні па наступных тэмах:

• роля і функцыі арганізацый грамадзянскай супольнасці (АГС);

• падыход, заснаваны на правах чалавека, і скразныя каштоўнасці ў дзейнасці АГС;

• планаванне ў АГС, распрацоўка праектаў;

• лідэрства ў АГС; матывацыя, праца каманды, вырашэнне канфліктаў;

• ацэнка патрэбаў мэтавых груп;

• маніторынг і ацэнка эфектыўнасці дзейнасці;

• прынцыпы добрасумленнага кіравання (good governance), забеспячэнне ўстойлівасці арганізацыі.

Для каго

Падаць заяўку на курс могуць прадстаўнікі і прадстаўніцы беларускіх арганізацый грамадзянскай супольнасці, якія працуюць з тэмамі правоў чалавека. Магчымы ўдзел 2 чалавек ад арганізацыі. Пры адборы ўдзельнікаў перавага будзе наддавацца:

• арганізацыям і ініцыятывам, якія пачалі сваю працу пасля жніўня 2020 года;

• заяўнікам, якія далучыліся да больш дасведчаных арганізацый за апошнія два гады і маюць недастатковыя кіраўнічыя кампетэнцыі.

Як трапіць на курс

Адбор удзельнікаў і ўдзельніц будзе праходзіць на конкурснай аснове, асабліва будзе ўлічвацца магчымасць далейшага выкарыстання атрыманых ведаў і ўменняў, а таксама матывацыя патэнцыйных удзельнікаў курса.

Ахвочым прыняць удзел трэба запоўніць заяўку па спасылцы не пазней за 12:00 31 кастрычніка (па беларускім часе). Пра вынікі адбору ўдзельнікаў і ўдзельніц мы паведамім не пазней за 4 лістапада.

Уступная сесія курса пройдзе 7 лістапада а 17:00 па беларускім часе.

Кантакты

Па пытаннях аб удзеле ў курсе звяртайцеся па электроннай пошце capacity@belhumanrights.house.