Заява аб прызнанні шасці чалавек палітычнымі зняволенымі (Максім Рэмезаў і іншыя)

Заява праваабарончай супольнасці Беларусі

23 лістапада 2024 г.

Мы, прадстаўнікі праваабарончай супольнасці Беларусі, зноў адзначаем, што пазбаўленне волі і крымінальная адказнасць за розную пратэсную актыўнасць выкарыстоўваецца ўладамі для ўціску грамадскай ды палітычнай актыўнасці, іншадумства і антываенных выступаў.

Крымінальнае заканадаўства ў 2021 годзе было істотна больш жорсткім і дапоўненае новымі складамі злачынстваў, якія выкарыстоўваюцца ўладамі выключна ў мэтах палітычных рэпрэсій.

МУС і КДБ у пазасудовым парадку адвольна прызнаюць экстрэмісцкімі групы грамадзян, аб'яднаных грамадскімі або палітычнымі інтарэсамі, якія крытыкуюць дзеянні ўладаў і патрабуюць зменаў у дзяржаве і яе палітыцы, таксама экстрэмісцкімі фармаваннямі прызнаныя некаторыя СМІ. Гэта ў сваю чаргу адкрывае шлях да адвольнага прыцягнення да крымінальнай адказнасці і пазбаўлення волі іх удзельнікаў і рэспандэнтаў у якасці непрапарцыйнай меры абмежавання права на асацыяцыю і свабоды выказвання меркаванняў. Так, заключаныя пад варту:

• Максім Рэмезаў па абвінавачванні ў фінансаванні экстрэмісцкай дзейнасці і ўдзелу грамадзян у ваенных канфліктах па арт. 361-2 і 361-3 КК за ахвяраванні пратэстным ініцыятывам і беларускім добраахвотнікам у складзе Узброеных Сіл Украіны;

• Цімур Лозка па абвінавачванні ў фінансаванні тэрарыстычнай дзейнасці па арт. 290-1 КК за ахвяраванне пратэстнай ініцыятыве;

• Міхаіл Фандо па абвінавачванні ў фінансаванні ўдзелу грамадзян у ваенных канфліктах па арт. 361-3 КК за ахвяраванні беларускім добраахвотнікам у складзе Узброеных Сіл Украіны;

• Сяргей Скібінскі па абвінавачванні ў садзейнічанні экстрэмісцкай дзейнасці і актыўным удзеле ў групавых дзеяннях, якія груба парушаюць грамадскі парадак, па арт. 361-4 і 342 КК.

Суд накіраваў на прымусовае лячэнне ў псіхіятрычным стацыянары:

• Аскера Алахвердзіева па ч. 1 арт. 361-3 КК (удзел на тэрыторыі замежнай дзяржавы ва ўзброеным фармаванні або ўзброеным канфлікце, ваенных дзеянняў, вярбоўка або падрыхтоўка асоб да такога ўдзелу);

• Наталлю Манылу па арт. 361-4 КК па абвінавачванні ў садзейнічанні экстрэмісцкай дзейнасці.

Мы прызнаем названых людзей палітвязнямі ў адпаведнасці з п. 3.1 (а) Кіраўніцтва па вызначэнні паняцця "палітычны зняволены", і патрабуем ад уладаў Беларусі:

• неадкладна вызваліць палітвязняў Максіма Рэмезава, Цімура Лозку, Міхаіла Фандо, Сяргея Скібінскага, Аскера Алахвердзіева, Наталлю Манылу;

• неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.

Праваабарончы цэнтр "Вясна";

Беларуская асацыяцыя журналістаў;

Беларускі Хельсінкскі Камітэт;

Беларускі ПЭН.