Дэманстрацыя ў Бэрліне: Свабоду ляўрэату Нобэлеўскай прэміі міру Алесю Бяляцкаму

25 верасьня Алесю Бяляцкаму споўніўся 61 год. Заснавальнік беларускага праваабарончага цэнтра "Вясна" і ляўрэат Нобэлеўскай прэміі міру 2022 года мусіў правесьці свой дзень нараджэньня ў турме. З гэтай нагоды праваабаронцы і грамадзкія актывісты Нямеччыны расказалі пра ягоны лёс і лёс усіх палітвязьняў у Беларусі.

У панядзелак праваабарончыя арганізацыі “Лібэрэка”, “Amnesty International GermanyЙ і беларуская суполка RAZAM выступілі супраць парушэньняў правоў чалавека ў Беларусі каля Брандэнбургскай брамы ў цэнтры Бэрліна і прадэманстравалі сваю салідарнасьць з усімі беларусамі, якія пацярпелі ад рэпрэсіяў. Як і чацьвёра ягоных калегаў па “Вясьне”, Алесь Бяляцкі знаходзіцца ў турме ў Беларусі выключна праз сваю законную праваабарончую дзейнасьць.

На дэманстрацыі дэпутаты Бундэстага Ёханэс Шрапс, Юрген Хардт, Хельге Лімбург, Штэфан Гельбхаар і Антон Хофрайтэр асудзілі дзеяньні рэжыму дыктатара Аляксандра Лукашэнкі супраць Алеся Бяляцкага і рэзка раскрытыкавалі незьлічоныя масавыя парушэньні свабоды слова, асацыяцыяў і сходаў у суседняй з ЕС дзяржаве. У межах кампаніі салідарнасьці, зладжанай “Ліберэка” – #WeStandBYyou – кожны з палітыкаў раней «усынавіў» аднаго з амаль 1500 палітычных зьняволеных.

Катаваньні і іншыя віды жорсткага абыходжаньня па-ранейшаму зьяўляюцца распаўсюджанай практыкай

Пасьля жорсткага падаўленьня масавых пратэстаў у 2020 годзе ў Беларусі рэзка ўзмацніліся перасьледы палітычных апанэнтаў. Алесь Бяляцкі знаходзіцца ў турме з 14 ліпеня 2021 года. 3 сакавіка 2023 года па сфабрыкаваных абвінавачаньнях ён быў вырачоны да дзесяці гадоў пазбаўленьня волі і буйнога штрафу.

У беларускіх турмах катаваньні і іншыя віды жорсткага абыходжаньня па-ранейшаму зьяўляюцца звычайнай практыкай і застаюцца беспакаранымі. Судовая сыстэма выкарыстоўваецца для прыгнечаньня крытычных галасоў, а ўлады адвольна высоўваюць абвінавачваньні ў «экстрэмізме» і «тэрарызме» супраць арганізацыяў, каб спыніць іх дзейнасьць і ўзаконіць крымінальны перасьлед. Напрыклад, у канцы жніўня МУС Беларусі клясіфікавала "Вясну" як "экстрэмісцкае аб'яднаньне".

Арыгінал (на ангельскай мове) на сайце “Ліберэка”

Пераклад на беларускую мову: БДПЧ