Еўрапейская федэрацыя журналістаў: «Дыктатар вельмі памыляецца, калі думае, што гэты суд пакладзе канец дзейнасці БАЖ»

«Гэта пародыя на правасуддзе» - Еўрапейская федэрацыя журналістаў (EFJ) і Міжнародная федэрацыя журналістаў (IFJ) пракаментавалі ліквідацыю БАЖ.

«Вярхоўны суд Беларусі ліквідаваў Беларускую асацыяцыю журналістаў, адзіную незалежную прадстаўнічую арганізацыю журналістаў і супрацоўнікаў СМІ ў Беларусі, абаронцаў свабоды слова. Еўрапейская федэрацыя журналістаў (EFJ) і Міжнародная федэрацыя журналістаў (IFJ) рашуча асуджаюць гэтую пародыю на правасуддзе.

У Мінску ў Вярхоўным судзе Беларусі адбылося пасяджэнне аб роспуску БАЖ, філіяла EFJ і IFJ у Беларусі. Больш за 25 гадоў ГА «БАЖ» і яе сябры, больш за 1300 супрацоўнікаў СМІ, спрыялі свабодзе выказвання меркаванняў і незалежнай журналістыцы ў Беларусі дзеля рэалізацыі грамадзянскіх, сацыяльных і культурных правоў.

БАЖ уваходзіць у лік дзясяткаў арганізацый, якія трапілі пад ліквідацыю. Сярод іх – арганізацыі па ахове культуры, навакольнага асяроддзя і спадчыны, Беларускі ПЭН-цэнтр, Офіс па правах інвалідаў, Нацыянальная моладзевая рада, Беларускі прэс-клуб, арганізацыі, якія займаюцца гендэрнымі правамі і групы, якія падтрымліваюць пажылых людзей.

«Пасля арганізацыі фальшывых выбараў, каб утрымацца ва ўладзе, беларускі дыктатар Аляксандр Лукашэнка прыступае да поўнай ліквідацыі ўсёй грамадзянскай супольнасці Беларусі», – заявіў прэзідэнт EFJ Могенс Бліхер Б'ерэгард. «Гэтая беспрэцэдэнтная чыстка павінна мабілізаваць міждзяржаўныя арганізацыі. Мы заклікаем Еўрапейскі Саюз, Савет Еўропы, АБСЕ і ААН рашуча адрэагаваць. Вінаватыя ў рэпрэсіях павінны быць жорстка пакараны».

«Дыктатар вельмі памыляецца, думаючы, што гэты суд пакладзе канец дзейнасці БАЖ», - дадаў генеральны сакратар EFJ Рыкарда Гуцьерэс. «Мы будзем дапамагаць нашаму беларускаму філіялу падтрымліваць іх існаванне і дзейнасць. БАЖ ніколі не скарыцца. БАЖ як ніколі застаецца для нас адзінай прадстаўнічай арганізацыяй журналістаў у Беларусі. ГА «БАЖ» будзе працягваць падтрымку журналістаў і супрацоўнікаў СМІ. Ужо запланаваны ініцыятывы па мабілізацыі кіраўніцтва БАЖ і яго членаў».

Арыгінал артыкула на сайце EFJ

Пераклад на беларускую мову – БДПЧ