Рада па правах чалавека ААН запускае механізм расследавання парушэнняў правоў чалавека ў Беларусі

 24 сакавіка Рада па правах чалавека ААН прыняла важную рэзалюцыю па Беларусі. Гэтая рэзалюцыя запускае механізм ААН расследавання і дакументавання злачынстваў супраць чалавечнасці ў Беларусі.

Вярхоўны камісар ААН па правах чалавека Мішэль Бачэлет атрымала шырокі мандат паўнамоцтваў. 16 супрацоўнікаў і тры эксперты будуць займацца парушэннямі правоў чалавека ў Беларусі ў Офісе Вярхоўнага камісара.

У бліжэйшыя месяцы яны будуць расследаваць парушэнні правоў чалавека ў Беларусі і збіраць доказы, каб вінаватыя былі прыцягнутыя да адказнасці, а пацярпелыя атрымалі справядлівае расследаванне злачынстваў у дачыненні да іх. Вынікі расследавання будуць падставай для правядзення сумленнага і незалежнага суду ў новай Беларусі і для крымінальных справаў  па міжнароднай юрысдыкцыі.

Рэзалюцыя таксама:

- заклікае рэжым забяспечыць свабодныя і справядлівыя выбары, пачаць дыялог з прадстаўнікамі дэмакратычнага руху і ўзаемадзеянне з АБСЕ;

 - асуджае шматлікія акты катаванняў, гвалтоўныя знікненні, выкраданні, адвольнае выгнанне палллітычных апанентаў з Беларусі, арышты, адвольнае пазбаўленне жыцця, акты сэксуальнага і гендэрнага гвалту;

- заклікае спыніць гвалт і вызваліць палітзняволеных, журналістаў, праваабаронцаў, сябраў стачкамаў, студэнтаў і ўдзельнікаў пратэстаў.

Аб гэтым паведамляе штаб Святланы Ціханоўскай.