Рыкарда Гуцьерэс: «Усе еўрапейскія кампаніі і дзяржавы, якія супрацоўнічаюць з дыктатурай, – саўдзельнікі рэпрэсій»

Праз год пасля ашуканскага перавыбрання незаконнага прэзідэнта Аляксандра Лукашэнкі рэпрэсіі беларускага рэжыму набылі драматычныя наступствы: 497 журналістаў і супрацоўнікаў СМІ былі арыштаваныя, 29 да гэтага часу знаходзяцца пад вартай. Еўрапейская федэрацыя журналістаў (EFJ) заклікае міжнародную супольнасць прыняць меры.

Вось вынік гадавых рэпрэсій у Беларусі, паводле звестак Беларускай асацыяцыі журналістаў (БАЖ):

·       Затрыманні журналістаў і супрацоўнікаў СМІ: 497

·       Фізічны гвалт у дачыненні да журналістаў: 68

·       Адміністрацыйныя арышты журналістаў: 119

·       Журналісты і супрацоўнікі СМІ ў зняволенні: 29

·       Прадстаўнікі СМІ пад крымінальным пераследам: больш за 50 чалавек

·       Ператрусы ў офісах і кватэрах журналістаў: 135

·       Заблакаваныя сайты навінаў: больш за 100

·       Забароненыя СМІ: 10

«Мы заклікаем міжнародную супольнасць, у прыватнасці Еўрапейскі саюз, Савет Еўропы і Арганізацыю па бяспецы і супрацоўніцтву ў Еўропе, удвая павялічыць свае намаганні пакараць вінаватых у гэтых бясконцых рэпрэсіях», - заявіў прэзідэнт EFJ Могенс Бліхер Б'ерэгард.

«Дыктатарскі рэжым паказвае сваё сапраўднае аблічча. Ён запланаваў ліквідацыю нашага філіяла БАЖ! Чаго чакаюць урады замест таго, каб узмацніць санкцыі?»

«Да гэтага часу санкцыі, прынятыя ЕС супраць 100 высокапастаўленых асобаў Беларусі, не мелі ніякага эфекту», - дадаў генеральны сакратар EFJ Рыкарда Гуцьерэс. «Цяпер мы павінны пераследваць усе еўрапейскія кампаніі і дзяржавы, якія супрацоўнічаюць з дыктатурай і таму з'яўляюцца саўдзельнікамі рэпрэсій у Беларусі. Таксама варта падтрымаць рэлакацыю беларускіх прыхільнікаў дэмакратыі, у тым ліку журналістаў, і дапамагчы ім дзейнічаць з-за мяжы. Прыйшоў час арганізаваць супраціў дыктатуры».

Арыгінал артыкула на сайце europeanjournalists.org.

Пераклад на беларускую мову - БДПЧ.