У ААН занепакоеныя жорсткім абыходжаннем з жанчынамі ў беларускіх турмах

Незалежныя эксперты па правах чалавека, сярод якіх Нільс Муйжніекс, Спецыяльны дакладчык па пытанні аб становішчы ў галіне правоў чалавека ў Беларусі ды працоўныя групы па адвольных затрыманнях і гвалтоўных знікненнях 26 сакавіка заклікалі беларускія ўлады зрабіць захады ў сувязі з паведамленнямі аб жорсткім абыходжанні з жанчынамі, што ўтрымліваюцца ў папраўчых калоніях.

"Мы глыбока занепакоеныя жорсткім абыходжаннем з жанчынамі, асуджанымі ў сувязі з пратэстамі супраць прэзідэнцкіх выбараў 2020 года", – заявілі эксперты.

Яны выказалі трывогу з нагоды небяспечнага для жыцця стану палітзняволенай Вікторыі Кульшы, былой адміністратаркі Telegram-канала "97%", затрыманай восенню 2020 года і пасля асуджанай на чатыры з паловай гады калоніі.

Эксперты таксама выказалі занепакоенасць з нагоды трох жанчын-зняволеных сталага веку – Алены Гнаук, Вольгі Маёравай ды Ірыны Такарчук, – асуджаных у межах рэпрэсій, што разгортваюцца з 2020 года.

"Кепскія ўмовы ўтрымання ў спалучэнні з наўмысным жорсткім абыходжаннем, уключна з штрафным адзіночным зняволеннем, ставяць іх здароўе ў сур'ёзную небяспеку, – заявілі яны. – Больш за тое, паведамленні аб доўгім утрыманні Алены Гнаўк без сувязі са знешнім светам сведчаць аб тым, што расце небяспека яе гвалтоўнага знікнення".

Таксама прадстаўнікі ААН зноў паднялі з Беларуссю пытанне аб шырока распаўсюджаным жорсткім абыходжаннем з жанчынамі-зняволенымі ды зняволенымі сталага веку.

"Мы ўстрывожаныя тым, што Беларусь па-ранейшаму не развязвае гэтыя праблемы", – заявілі яны.

Публікуецца паводле сайта "Вясны"