FIDH заклікала адмяніць прысуды праваабаронцам «Вясны» і неадкладна вызваліць іх
)
У чарговую гадавіну прысуду праваабаронцам "Вясны" — лаўрэату Нобелеўскай прэміі міру, кіраўніку "Вясны" Алесю Бяляцкаму, віцэ-прэзідэнту FIDH Валянціну Стэфановічу, юрысту Уладзіміру Лабковічу — Абсерваторыя па абароне праваабаронцаў (FIDH-OMCT) зноў заклікала да іх неадкладнага і безумоўнага вызвалення і спынення пераследу ўсіх беларускіх праваабаронцаў.
У заяве нагадваецца, што абвінаваўчы прысуд тром праваабаронцам быў вынесены на падставе сфабрыкаваных абвінавачванняў, а таксама што прысуды былі пакінутыя ў сіле пасля разгляду апеляцыі.
"Трое праваабаронцаў былі адвольна арыштаваныя 14 ліпеня 2021 года ў межах скаардынаваных рэйдаў і адвольных арыштаў праваабаронцаў, журналістаў і арганізацый грамадзянскай супольнасці і правялі амаль 18 месяцаў у папярэднім зняволенні да пачатку судовага разбору па іх справе 5 студзеня 2023 года, — гаворыцца ў заяве. — З моманту свайго арышту спадары Бяляцкі, Стэфановіч і Лабковіч адвольна ўтрымліваліся ў жахлівых умовах, у выніку чаго стан іх здароўя значна пагоршыўся".
FIDH-OMCT адзначае, што рэпрэсіі супраць "Вясны" і яе сябраў з'яўляюцца часткай больш шырокага падаўлення грамадзянскай супольнасці ў Беларусі пасля масавых пратэстаў супраць фальсіфікаваных прэзідэнцкіх выбараў 2020 года. "Пасля пратэстаў улады закрылі ўсе праваабарончыя і іншыя незалежныя арганізацыі, у выніку чаго ў краіне не засталося ніводнай легальна дзейнай праваабарончай НДА", — падкрэсліваюць праваабаронцы.
Яны таксама адзначаюць, што "Вясна" — адна з вядучых беларускіх праваабарончых арганізацый, якая знаходзіцца ў авангардзе беларускага праваабарончага руху: "Вясна" таксама з'яўляецца лаўрэатам шматлікіх прэстыжных узнагарод за сваю непахісную пазіцыю ў галіне правоў чалавека і дэмакратыі, у тым ліку прэміі Right Livelihood Award (2020) і прэміі The Albie Awards (2022)".
FIDH-OMCT таксама ўзгадвае, што ў рамках пераследу арганізацыі сябры "Вясны" Марфа Рабкова і Андрэй Чапюк былі адвольна затрыманыя 17 верасня і 2 кастрычніка 2020 года адпаведна па абвінавачванні ў меркаванай арганізацыі злачынных груповак у перыяд з 2016 па 2020 год. 6 верасня 2022 года Мінскі гарадскі суд прысудзіў Марфу Рабкову да 15 гадоў турэмнага зняволення, а Андрэя Чапюка — да шасці гадоў турэмнага зняволення. Аналагічным чынам, Леанід Судаленка, кіраўнік рэгіянальнага аддзялення "Вясны" ў Гомелі, быў адвольна затрыманы і вызвалены толькі ў ліпені 2023 года, пасля поўнага адбыцця свайго трохгадовага тэрміну зняволення.
"Абсерваторыя рашуча асуджае несправядлівы прысуд і працягванне адвольнага затрымання Алеся Бяляцкага, Валянціна Стэфановіча, Уладзіміра Лабковіча, Марфы Рабковай і Андрэя Чапюка, а таксама асуджае палітычна матываваны, адвольны пераслед і жорсткае абыходжанне, якім яны падвяргаліся з моманту іх затрымання.
Абсерваторыя заклікае беларускія ўлады адмяніць вынесеныя ім прысуды, неадкладна і безумоўна вызваліць іх і ўсіх іншых зняволеных у Беларусі, асуджаных паводле палітычна матываваных абвінавачванняў, і пакласці канец усім актам пераследу ў дачыненні да іх, у тым ліку на судовым узроўні. Абсерваторыя таксама заклікае беларускія ўлады выконваць усе свае міжнародныя абавязацельствы ў галіне правоў чалавека і заклікае міжнародную супольнасць выкарыстоўваць усе даступныя меры для забеспячэння правасуддзя, падсправаздачнасці і пакрыцця шкоды ўсім праваабаронцам, адвольна зняволеным у турме ў Беларусі".
Глядзiце таксама
)
)
)
)
)
Атрымаць падтрымку
