Не забыць ніводнага, хто за кратамі. У Хельсінкі адкрылі стэнд пра журналістаў за кратамі і размаўлялі пра падтрымку Беларусі
)
На фота: Сябра праўлення «Рэпарцёраў без межаў – Фінляндыя» Інгрыд Сванфельд і намеснік старшыні БАЖ Барыс Гарэцкі ў музеі медыя Merkki каля стэнда, прысвечанага беларускім журналістам-палітвязням. Хельсінкі, 8 жніўня 2024 года. Фота: БАЖ
8 жніўня ў Хельсінкі адкрылі стэнд з паштовымі скрынямі для лістоў беларускім журналістам за кратамі. Сцяна са скрынямі размешчаная ў сталічным музеі медыя Merkki.
«Наяўнасць палітвязняў – гэта нонсэнс»
Удзел у адкрыцці стэнду прынялі прадстаўнікі арганізацыі «Рэпарцёры без межаў» з Фінляндыі і Швецыі, Саюза журналістаў Фінляндыі, старшыня камітэту па замежных справах парламенту Фінляндыі, прадстаўнікі Беларускай асацыяцыі журналістаў, а таксама праваабаронца і былы палітзняволены Леанід Судаленка.
— Гэтай ініцыятывай мы хочам прыцягнуць увагу грамадскасці да рэпрэсіяў у Беларусі і асабліва рэпрэсій супраць журналістаў.
Для Фінляндыі з’яўляецца нонсэнсам, што за кратамі могуць знаходзіцца палітычныя вязні, а тым больш прадстаўнікі прэсы.
Таму ў самым цэнтры Хельсінкі ў Музеі медыя паўстала такая сцяна з паштовымі скрынямі для дзясяткаў беларускіх журналістаў за кратамі, каб кожны наведнік музея мог даведацца пра сітуацыю са свабодай медыяў у Беларусі і адправіць лісты і паштоўкі беларусам і беларускам за кратамі, — расказала сябра праўлення «Рэпарцёраў без межаў – Фінляндыя» Інгрыд Сванфельд.
Інгрыд ужо некалькі гадоў арганізуе розныя дзеянні ў падтрымку беларускіх калегаў, бо калісьці вельмі блізка пасябравала са зняволенымі цяпер гомельскімі журналістамі Ларысай Шчыраковай і Яўгенам Меркісам.
Падтрымаць важную працу БАЖ можна праз Patreon!
Галоўны фокус увагі
Удзел у адкрыцці стэнду ўзяў намеснік старшыні Беларускай асацыяцыі журналістаў Барыс Гарэцкі. У сваёй прамове прадстаўнік БАЖ расказаў пра ўмовы, у якіх сёння ў турмах беларускага рэжыму ўтрымліваюць журналістаў. Па падліках БАЖ, за 4 гады пасля пачатку пратэстаў медыйшчыкаў у нашай краіне затрымлівалі болей за 700 раз.
Намеснік старшыні БАЖ Барыс Гарэцкі распавядае пра стан беларускіх журналістаў у зняволенні. Хельсінкі, 8 жніўня 2024 года. Фота: БАЖ
— Сотні калег прайшлі праз арышты, пацярпелі фізічна ад гвалту сілавікоў, а новыя рэпрэсіі мы пастаянна бачым і ў 2024 годзе, калі сілавікі прыходзяць з ператрусамі ў кватэры нават тых журналістаў, якія даўно пакінулі Беларусь. Але галоўны наш фокус увагі — 37 журналістаў і журналістак, якія сёння застаюцца ў беларускіх турмах. Яны закладнікі рэжыму. Цяпер у розных колах абмяркоўваюць розныя гіпатэтычныя абмены палоннымі альбо «памілаванні» з боку Лукашэнкі. БАЖ зможа сказаць пра нейкае памілаванне толькі тады, калі з турмаў выйдуць усе нашыя калегі, — кажа прадстаўнік БАЖ.
У сваім выступе і адказах на шматлікія пытанні прысутных Барыс падрабязна расказаў пра жахлівыя ўмовы, у якіх сёння трымаюць журналістаў за кратамі, а таксама пра працу незалежных медыяў, праграмы падтрымкі для прадстаўнікоў медыяў і магчымасці фінансава падтрымаць такія праграмы. Да Гарэцкага далучылася вядучая каналу Беларускай асацыяцыі журналістаў у ТікТок Кацярына Васілёнак.
Як спецыяліст па відэапрадуктах, Кацярына расказала фінскай аўдыторыі пра тое, якім чынам беларускім медыям удаецца ствараць паспяховыя якасныя прадукты для сацыяльных сетак, якія застаюцца актуальнымі, папулярнымі і ўплывовымі для аўдыторыі ўнутры краіны.
Уласны турэмны досвед і важнасць падтрымкі палітвязняў
Таксама са сваёй асабістай гісторыяй і гісторыяй сваёй праваабарончай працы перад прысутнымі выступіў вядомы праваабаронца, былы палітзняволены, прадстаўнік цэнтру «Вясна» Леанід Судаленка. У сваёй прамове спадар Леанід расказаў пра ўласны турэмны досвед і важнасць падтрымкі людзей, якія апынуліся за кратамі з прычынаў палітычнага пераследу.
Леанід Судаленка таксама згадаў і зняволенага кіраўніка «Вясны», беларускага нобелеўскага лаўрэата Алеся Бяляцкага, які ўжо больш за тры гады знаходзіцца ў турме.
Для ўдзелу ў адкрыцці беларускага стэнду ў музей прыехаў старшыня камітэту па замежных справах парламенту Фінляндыі Кімма Кільюнен. Кімма многія гады займаецца «беларускім пытаннем» у Фінляндыі, таму назваў вялікім гонарам для сябе быць на цырымоніі адкрыцця.
Глядзiце таксама
)
)
)
)
)
Атрымаць падтрымку
