Рашэнне не запрашаць назіральнікаў АБСЕ на выбары супярэчыць міжнародным абавязальніцтвам Беларусі
)
У Бюро па дэмакратычных інстытутах і правах чалавека (БДІПЧ) і Парламенцкай асамблеі (ПА) АБСЕ заявілі, што рашэнне беларускіх уладаў не запрашаць назіральнікаў ад АБСЕ на выбары супярэчыць міжнародным абавязацельствам Мінска і інтарэсам народа Беларусі. Кіраўнікі абодвух інстытутаў выказалі глыбокае шкадаванне і занепакоенасць праз тое, што ўлады Беларусі вырашылі не запрашаць у краіну назіральнікаў ад АБСЕ на парламенцкія выбары, якія адбудзяцца 25 лютага.
На думку дырэктара БДІПЧ Матэа Мекачы, такі крок "перашкодзіць грамадзянам і інстытутам краіны атрымаць бесстароннюю, празрыстую і ўсебаковую ацэнку" правядзення выбараў.
"Гэта супярэчыць абавязацельствам, узятым на сябе Беларуссю, і супярэчыць як літары, так і духу супрацоўніцтва, на якім заснавана АБСЕ", — заявіў ён.
А старшыня ПА АБСЕ Піа Каума заявіла, што "рашэнне беларускага ўрада ўхіліцца ад сваіх абавязацельстваў па запрашэнні назіральнікаў АБСЕ выклікае занепакоенасць і супярэчыць інтарэсам беларускага народа", і заклікала ўлады Беларусі да большай адкрытасці.
Нагадаем, 8 студзеня беларускі бок апавясціў БДІПЧ АБСЕ пра свой намер не запрашаць назіральнікаў. МЗС Беларусі абгрунтавала гэта рашэнне "традыцыйным дамінаваннем прадстаўнікоў краін Захаду ў гэтых місіях АБСЕ", "увядзеннем краінамі Захаду неапраўдана жорсткіх палітычных і эканамічных санкцый, у тым ліку ў дачыненні да ЦВК і парламента", а таксама "пагаршэннем па віне Захаду лагістычных магчымасцяў выезду і ўезду з Беларусі". Днямі стала вядома, што назіраць за парламенцкімі выбарамі ў Беларусі адправіцца місія ПА АДКБ.
Напачатку выбарчай кампаніі эксперт кампаніі "Праваабаронцы за свабодныя выбары" Павел Сапелка адзначыў, што назіранне, як незалежнае нацыянальнае, так і міжнароднае, заўсёды было адной з гарантый правядзення свабодных выбараў:
"Калі незалежнае назіранне выганяецца з выбарчага працэсу, давер да выбараў і іх вынікаў імкліва падае. Гэты давер не атрымаецца аднавіць за кошт пазіцый "сяброў" па клубе аўтарытарных і таталітарных рэжымаў, і нават за кошт аднадумцаў рэжыму – палітыкаў-адзіночак з неадназначнай рэпутацыяй з дэмакратычных суб'ектаў. З іншага боку, назіранне, асабліва з боку аўтарытэтных міжнародных суб'ектаў, якім па праве з'яўляецца, напрыклад БДІПЧ АБСЕ, заклікана паляпшаць выбарчыя працэсы. А гэта зусім не цікава рэжыму, які трымаецца ва ўладзе менавіта дзякуючы фальсіфікацыі вынікаў выбараў. Такім чынам, выбарчая сістэма як інстытут будзе дэградаваць".
Глядзiце таксама
)
)
)
)
Атрымаць падтрымку
