«Яе жыццё пад немінучай пагрозай». Еўрапейскі парламент выступіў з заявай з нагоды галадоўкі Вікторыі Кульшы

Бюро дэлегацыі Еўрапейскага парламента па сувязях з Беларуссю 30 красавіка выступілі з заявай з нагоды галадоўкі палітзняволенай Вікторыі Кульшы. Гэта яе шостая галадоўка з моманту затрымання на знак пратэсту з яе незаконным утрыманнем у няволі. У Еўрапейскім парламенце залікалі беларускія ўлады прадаставіць Вікторыі Кульшы неадкладны доступ да медыцынскай дапамогі і спыніць усе формы палітычнага пераследу ў дачыненні да яе і іншых мірных актывістаў у Беларусі. Акрамя таго, Еўрапейскі парламент заклікаў Еўрапейскі Саюз увесці адрасныя санкцыі ў дачыненні да асоб, адказных за пераслед Вікторыі Кульшы, а таксама актывізаваць дыпламатычныя намаганні, накіраваныя на забеспячэнне неадкладнага і безумоўнага вызвалення палітзняволенай, піша "Вясна".

Нгадаем, палітзняволеная Вікторыя Кульша не выйшла на волю ў красавіку 2025 года па заканчэнні тэрміну, бо яе перавялі ў гомельскі СІЗА-3 у межах чацвёртай крымінальнай справы паводле ч. 1 арт. 411 Крымінальнага кодэкса (злоснае непадпарадкаванне законным патрабаванням адміністрацыі калоніі). Раней ёй ужо тройчы прызначалі пазбаўленне волі па гэтым артыкуле. 30 красавіка былая палітзняволеная Паліна Шарэнда-Панасюк паведаміла, што Вікторыя ў СІЗА абвясціла бестэрміновую галадоўку.

Еўрапейскі парламент выказвае глыбокую занепакоенасць у сувязі са справай палітзняволенай Вікторыі Кульшы:

"Пасля некалькіх гадоў зняволення ў суровых умовах фізічнае і псіхічнае здароўе спадарыні Кульшы сур'ёзна пагоршылася. Яе цяперашняя галадоўка ставіць яе жыццё пад немінучую пагрозу. Ёсць асцярогі, што яна можа стаць першай жанчынай-палітзняволенай, якая памрэ ў беларускім зняволенні пры рэжыме Лукашэнкі.

Мы катэгарычна абвяргаем абвінавачванні, выстаўленыя супраць спадарыні Кульшы, якія ўяўляюць сабой парушэнне асноўных правоў, замацаваных у Статуце ААН, у прыватнасці права на свабоду выказвання меркавання і права на справядлівы суд. Яе справа з'яўляецца прыкладам сістэмнага невыканання Беларуссю сваіх міжнародных абавязацельстваў і адвольнага характару яе судовай сістэмы".

У сувязі з гэтым у Еўрапарламенце заклікаюць беларускія ўлады:

• Прадаставіць Вікторыі Кульшы неадкладны доступ да адэкватнай медыцынскай дапамогі і забяспечце рэгулярныя канфідэнцыйныя кантакты з яе сям'ёй і адвакатам.

• Спыніць усе формы палітычнага пераследу ў дачыненні да яе і іншых мірных актывістаў.

Таксама Еўрапарламент заклікаў Еўрапейскі Саюз і яго дзяржавы-члены ўвесці адрасныя санкцыі ў дачыненні да асоб, адказных за вынясенне прысуду Вікторыі Кульшы, а менавіта суддзяў Жанны Хвайніцкай, Сяргея Мальцава і Станіслава Іванюценкі, пракурора Аляксандра Караля і аператыўнага супрацоўніка папраўчай калоніі № 24 Дзмітрыя Саманчука.

Акрамя таго, у заяве заклікаюць Еўрапейскі Саюз і яго дзяржавы-члены актывізаваць дыпламатычныя намаганні, накіраваныя на забеспячэнне неадкладнага і безумоўнага вызвалення спадарыні Вікторыі Кульшы.

"Вельмі важна, каб ЕС працягваў абараняць правы чалавека і вяршэнства закона, прыцягваючы да адказнасці вінаватых у парушэннях у Беларусі. Міжнародная супольнасць не павінна маўчаць перад тварам гэтых абуральных парушэнняў правоў чалавека. Жыццё спадарыні Вікторыі Кульшы і прынцыпы свабоды і дэмакратыі, якія яна адстойвае, павінны быць абаронены".

Палітзняволеную інжынерку па ахове працы затрымалі 4 лістапада 2020 года за тое, што яна адміністравала тэлеграм-чат "Кіроўцы 97% Мінск". Яе абвінавацілі паводле ч. 1 і ч. 2 арт. 342 Крымінальнага кодэкса (актыўны ўдзел у дзеяннях, што груба парушаюць грамадскі парадак). У лютым 2021 года Вікторыю асудзілі да двух з паловай гадоў калоніі і накіравалі адбываць тэрмін у гомельскую жаночую калонію № 4.

Пазней Вікторыю тройчы асудзілі паводле ч. 1 арт. 411 КК і прызначылі ёй агулам тры гады пазбаўлення волі. Увесь час у зняволенні на жанчыну аказваецца ціск. Яе неаднаразова змяшчалі ў штрафны ізалятар і ПКТ. Па інфармацыі праваабаронцаў, у зарэчанскай калоніі № 24 адзін з наглядчыкаў збіваў Вікторыю. Праз галадоўкі ў яе двойчы здараўся сардэчны прыступ. Палітзняволеная тройчы спрабавала здзейсніць самагубства.

Арыгінальная публікацыя на сайце "Вясны"