20 траўня 2022 года (пятніца) ў памяшканні Цэнтра беларускай культуры і супольнасці ў Вільні (Vilnius g., 20) адбудзецца канферэнцыя “Права на ахову здароўя ў пенітэнцыярных установах Беларусі: міжнароднае і нацыянальнае заканадаўства і практыка". Пачатак у 10:30.
Тэма даступнасці і якасці медыцынскай дапамогі зняволеным, захавання і падтрымання здароўя ў месцах пазбаўлення волі была і застаецца актуальнай у большасці краін свету. Аднак жнівень 2020 года ў Беларусі, падзеі, якія адбыліся за гэтым, масавыя рэпрэсіі ў нашай краіне прымусілі звярнуць асабліва пільную ўвагу на гэтую праблему. У паведамленнях СМІ, расказах былых вязняў, родных і блізкіх зняволеных ёсць шмат сведчанняў таго, што перашкоды ў аказанні медыцынскай дапамогі ствараюцца мэтанакіравана ў якасці сродку дадатковага ціску на палітвязняў, аднаго са спосабаў узмацнення атмасферы страху і дзяржаўнага тэрору ў грамадстве. Ёсць ўсе падставы казаць аб наўмысным стварэнні ўмоў для нанясення шкоды здароўю зняволеных, асабліва ў кантэксце Covid-19 у месцах адбывання адміністрацыйнага арышту.
Публічная ўстанова "Урачы за праўду і справядлівасць" арганізавала экспертнае даследаванне праблемы захавання права на ахову здароўя зняволеных у пенітэнцыярных установах Беларусі і прадставіць яе вынікі на канферэнцыі 20 мая 2022 года. Акрамя прэзентацый экспертаў, плануецца калектыўнае абмеркаванне праблемы, а таксама магчымасцяў і спосабаў яе вырашэння на сучасным этапе.
Запрашаем зацікаўленых прыняць удзел у канферэнцыі. Для рэгістрацыі запоўніце, калі ласка, форму, перайшоўшы па спасылцы https://forms.gle/mnvTcRYUD432kTto9 .
*Калі спасылка не адкрываецца з дакумента, скапіруйце яе і ўстаўце ў адрасны радок браўзэра.
Праграма канферэнцыі будзе апублікавана на сайце ўстановы “Урачы за праўду і справядлівасць” і на нашых старонках у сацыяльных сетках у бліжэйшыя дні, пасля канчатковага ўзгаднення з усімі выступоўцамі. Запланаваны час пачатку - 10.30.