«У турмы не жаночае аблічча». Праваабаронцы запрашаюць на канферэнцыю ў Вільні

Праваабарончая ўстанова “Лекары за праўду і справядлівасць” запрашае на канферэнцыю “Жанчыны ў зняволенні: нябачны боль пенітэнцыярнай сістэмы Беларусі” для ўдзелу ў дыскусіі аб крызісным становішчы зняволеных жанчын у Беларусі. Канферэнцыя пройдзе 25 чэрвеня 2025 года ў Вільні.

Як адзначаюць "Лекары за праўду і справядлівасць" , Беларусь працягвае трымаць сумнае лідэрства ў Еўропе не толькі па колькасці зняволеных у адносінах да колькасці насельніцтва, але і па колькасці зняволеных жанчын.

"Па нашых дадзеных, у беларускіх турмах утрымліваецца не менш за 30 000 вязняў, з якіх каля 10 % — жанчыны. А сярод палітычных зняволеных жанчыны складаюць ужо амаль 15 %".

Жанчыны ў пенітэнцыярнай сістэме застаюцца нябачнымі:

• сістэма аховы здароўя не ўлічвае іх спецыфічных патрэбаў;

• доступ да псіхалагічнай і медыцынскай дапамогі выразна абмежаваны;

• гвалт, прыніжэнне і абыякавасць з боку адміністрацыі з’яўляюцца не выключэннямі, а нормай.

Трагічныя выпадкі смерці Ганны Кандраценка і Тамары Каравай, якія нядаўна памерлі пасля вызвалення, толькі падкрэсліваюць патрэбу ва ўсебаковым аналізе ролі пенітэнцыярных медыцынскіх службаў.

На канферэнцыі 25 чэрвеня каманда “Лекараў за праўду і справядлівасць” прэзентуе: вынікі комплекснага даследавання пра стан здароўя і правы жанчын у зняволенні; сведчанні тых, хто прайшоў праз турмы; экспертаў і экспертак з галіны медыцыны, права і псіхалогіі. Праграма канферэнцыі таксама прадугледжвае дыскусію на згаданыя тэмы.

Сярода закранутых тэмаў будуць:

• "Жанчына ў беларускай турме. Правы зняволеных жанчын і беларускія рэаліі ў кантэксце правоў чалавека" (Павел Сапелка, ПЦ "Вясна");

• "Псіхалагічныя наступствы пазбаўлення волі для жанчын у Беларусі: ПТСР і дэпрэсія як праяўленні. Патрэба ў псіхалагічнай дапамозе падчас і пасля зняволення" (Вольга Вялічка);

• "Рэпрадуктыўнае здароўе жанчын і зняволенне" (Станіслаў Салавей);

• "Псіхічнае здароўе жанчын у зняволенні і пасля вызвалення" (Уладзімір Пікірэня);

• і інш.

Уваход на канферэнцыю вольны, але дзеля забяспячэння спрыяльных умоў удзельнікаў просяць прайсці папярэднюю рэгістрацыю па спасылцы.

Дата і месца правядзення:

• 25 чэрвеня 2025 г., 10.00 – 16.30

• канферэнц-зала Conti Hotel - Raugyklos g. 7, Вільня

Кантакты для атрымання дадатковай інфармацыі:

• doctorsby.com@gmail.com

• +370 63827081