Амерыканскі ПЭН асуджае вырок Марыі Калеснікавай і Максіму Знаку

Праваабарончая арганізацыя Амерыканскі ПЭН-цэнтр выступіла з заявай з нагоды выроку Марыі Калеснікавай і Максіму Знаку.

7 верасня 2021 года. (Нью-Ёрк) - На гэтым тыдні суд у сталіцы Беларусі Мінску асудзіў двух актывістаў апазіцыі па палітычна матываваных абвінавачваннях у змове з мэтай узурпацыі дзяржаўнай улады. Музыка Марыя Калеснікава і адвакат Максім Знак асуджаны на 11 і 10 гадоў пазбаўлення волі адпаведна.

Праваабарончая арганізацыя Амерыканскі ПЭН-цэнтр далучаецца да міжнароднай супольнасці і асуджае рашэння суда, а таксама патрабуе неадкладнага вызвалення актывістаў.

Арыштаваныя год таму актывісты ўваходзяць у Каардынацыйную раду Беларусі, створаную з мэтай садзейнічання мірнай перадачы ўлады пасля мінулых прэзідэнцкіх выбараў. Калеснікава, набліжаная да кандыдата Ціханоўскай, была выкрадзена ў Мінску 7 верасня 2020 года і дастаўлена да ўкраінскай мяжы з загадам пакінуць краіну; яна адмовілася і ў знак пратэсту разарвала пашпарт. Улады адказалі прад'яўленнем абвінавачванняў, а таксама 9 верасня арыштавалі Максіма Знака, яе блізкага паплечніка і адваката. Суд над актывістамі, які пачаўся 4 жніўня, праходзіў хутка і сумніўна, без публічнага доступу да слуханняў або матэрыялаў справы.

«Драконаўскія прысуды Марыі Калеснікавай і Максіму Знаку дэманструюць страх беларускага рэжыму перад мірнай грамадзянскай апазіцыяй. Асабліва гэта праяўляецца ў кантрасце з адвагай Марыі і яе нежаданнем пакідаць краіну. Абвінавачванні, выстаўленыя палітычным актывістам, не маюць доказаў; рашэнне суда з'яўляецца злоўжываннем заканадаўствам аб нацыянальнай бяспецы, якое стала інструментам для падаўлення апазіцыйнага руху», – заявіла Паліна Садоўская, кіраўнік еўразійскага накірунку ў Амерыканскім ПЭНе.

«Гэта грубае парушэнне правоў чалавека і асноўных свабод; на жаль, беларускі рэжым ужо даў зразумець, што для яго гэта не каштоўнасці. Міжнародная супольнасць павінна ціснуць на рэжым Лукашэнкі і стаяць побач з беларусамі, якія не раз цярпелі абуральныя напады на іх свабоды і правы».

Іх прысуды – гэта працяг маштабнага разгрому апазіцыйнага руху ў Беларусі, які вядзе адміністрацыя Аляксандра Лукашэнкі ў адказ на леташнія мірныя масавыя акцыі пратэсту. Многія журналісты, праваабаронцы і творцы былі арыштаваныя; незалежныя арганізацыі і сродкі масавай інфармацыі сталі аб'ектамі ператрусаў, у той час як Міністэрства юстыцыі Беларусі ліквідавала Беларускі ПЭН-цэнтр.

ПЭН-Амерыка сочыць за сітуацыяй у Беларусі па пытаннях свабоды выказвання меркаванняў праз сваю праграму «Еўразія» і заклікае неадкладна спыніць нахабныя парушэнні правоў чалавека ў краіне.

Арыгінал артыкула на сайце Амерыканскага ПЭНа

Пераклад на беларускую мову: БДПЧ