Камітэт абароны журналістаў выступіў супраць велізарных турэмных тэрмінаў для Рамана Пратасевіча, Сцяпана Пуцілы і Яна Рудзіка

Парыж, 21 красавіка 2023 года - Беларускі пракурор запытаў 10-гадовы турэмны тэрмін для затрыманага журналіста Рамана Пратасевіча, 19-гадовы турэмны тэрмін завочна для журналіста Яна Рудзіка і 20-гадовы турэмны тэрмін завочна для журналіста Сцяпана Пуцілы падчас суду ў Менску.

«Велізарныя турэмныя тэрміны, якія запатрабаваў пракурор для Рамана Пратасевіча, Сцяпана Пуцілы і Яна Рудзіка, з'яўляюцца яшчэ адной ілюстрацыяй помслівасці рэжыму. Рэжым помсціць тым, хто асвятляў пратэсты супраць Аляксандра Лукашэнкі ў 2020 годзе», – сказала Гульноза Саід, каардынатар праграм Камітэта абароны журналістаў у Еўропе і Цэнтральнай Азіі. «Улады павінны неадкладна зняць усе абвінавачанні з трох журналістаў, вызваліць Пратасевіча з-пад хатняга арышту і дазволіць прадстаўнікам прэсы свабодна працаваць».

Прадстаўнік праваабарончай арганізацыі «Вясна» паведаміў Камітэту абароны журналістаў на ўмовах ананімнасці, баючыся рэпрэсій, што прысуд па справе можа быць вынесены ў бліжэйшыя тыдні. На электронны ліст Камітэта абароны журналістаў у пракуратуру Мінска адказу не было.

Сама меней 26 журналістаў, разам з Пратасевічам, знаходзяцца ў зняволенні ў Беларусі на момант перапісу, праведзенага Камітэтам абароны журналістаў 1 снежня 2022 года.

Цалкам артыкул (на ангельскай мове) на сайце Камітэта абароны журналістаў.

Пераклад на беларускую мову: БДПЧ