Лукашэнка падпісаў рэпрэсіўныя змены ў закон, які ставіць крыж на незалежных СМІ ў Беларусі

03 July 2023, 10:34 AM
Лукашэнка падпісаў рэпрэсіўныя змены ў закон, які ставіць крыж на незалежных СМІ ў Беларусі

Крыніца: Беларуская асацыяцыя журналістаў

БАЖ адзначае, што 1 ліпеня прэс-служба Аляксандра Лукашэнкі распаўсюдзіла заяву, што той ухваліў змены ў закон «Аб сродках масавай інфармацыі». Дакумент пашырае пералік падстаў для анулявання пасведчання дзяржаўнай рэгістрацыі медыя і абмежавання доступу да інтэрнэт-рэсурсу, сеткавага выдання, навінавага агрэгатара. Ва ўсіх выпадках маюцца на ўвазе недзяржаўныя СМІ. 

Раней законапраект без аніякіх пярэчанняў прайшоў усе папярэднія «экспертныя» інстытуты. 18 красавіка і 31 траўня змяненні ў прапанаванай  Саветам міністраў рэдакцыі дэпутаты Палаты прадстаўнікоў прынялі ў першым і другім чытанні адпаведна. 14 чэрвеня іх адзінагалосна ўхвалілі чальцы Савета Рэспублікі. Подпіс Лукашэнкі быў простай фармальнасцю.

Як адзначаецца ў юрыдычным тлумачэнні, «пераследуецца забеспячэнне канстытуцыйнага права грамадзян на атрыманне поўнай і дакладнай інфармацыі, абароны дзяржаўных і грамадскіх інтарэсаў, нацыянальнай бяспекі ў сферы масавай інфармацыі».

Нягледзячы на тое, што закон наўпрост закранае як значную колькасць вытворцаў інфармацыйнага кантэнту, так і яшчэ большую армію спажыўцоў, яго змест на этапе складання не апублічваўся і праўкі ўносіліся кулуарна. Іншымі словамі, новыя рэаліі зацікаўленым бакам прэзентавалі як факт.

Між тым, з абнародаваных пунктаў вынікае, што навацыі яшчэ больш абмяжоўваюць магчымасці як дзяржаўнай, так і незалежнай прэсы — пад прыкрыццём таго, што гэта дыктуе неабходнасць «адэкватна рэагаваць на дэструктыўныя працэсы ў медыяпрасторы»:

• пашырэнне пераліку падстаў для анулявання пасведчання аб дзяржаўнай рэгістрацыі СМІ, абмежавання доступу да інтэрнэт-рэсурсу, сеткавага выдання, агрэгатара навін;

• дэталізацыя патрабаванняў да дзейнасці ўладальнікаў інтэрнэт-рэсурсаў, якія распаўсюджваюць прадукцыю тэлевізійных альбо радыёвяшчальных сродкаў масавай інфармацыі;

• вызначэнне асаблівасцей функцыянавання навінавых агрэгатараў і правававога статусу іх уладальнікаў;

•  удакладненне парадку дзейнасці замежных сродкаў масавай інфармацыі на тэрыторыі Рэспублікі Беларусь;

• замацаванне магчымасці прымянення захадаў у адказ у дачыненні да замежных сродкаў масавай інфармацыі, інтэрнэт-рэсурсаў, журналістаў. 

У 2021 годзе Закон аб СМІ ўжо зведаў карэктывы ў бок жорсткіх абмежаванняў. Сярод іншага тады акрэдытаваным карэспандэнтам забаранілі рабіць наўпроставыя ўключэнні з масавых пратэстаў; пазбавілі права публікаваць вынікі сацыялагічных апытанняў; крыміналізавалі распаўсюд персанальных дадзеных чыноўнікаў; увялі дадатковыя падставы блакаваць любы друкаваны ці інтэрнэт-рэсурс і г. д.  

Аднак, паводле ініцыятараў чарговых новаўводзінаў, з улікам глабальных геапалітычных зрухаў, тэхналагічных рэалій, выклікаў і пагроз наспела неабходнасць унясення дадатковых зменаў. Перадусім гэта тычыцца абмежавання доступу да рэсурсаў, якія ўлады лічаць «нелаяльнымі  дзейнаму рэжыму».

Выглядае, што, кіруючыся менавіта такой логікай, Міністэрства інфармацыі Беларусі рэгулярна абнаўляе свой «экстрэмісцкі спіс», дадаючы туды чарговыя медыйныя платформы з «забароненым для распаўсюду» кантэнтам.

Праз мэтанакіраваны пераслед незалежных СМІ ў Беларусі практычна не засталося легальных інфармацыйных крыніц з альтэрнатыўным меркаваннем. Гэтую місію цяпер выконваюць рэдакцыі, якія падчас масштабных зачыстак грамадзянскай супольнасці вымушана эвакуяваліся за межы краіны.

Тым часам больш за тры дзясяткі былых і дзейных супрацоўнікаў недзяржаўных медыя застаюцца за кратамі паводле абсурдных абвінавачванняў у прафесійнай дзейнасці.

Арыгінальны артыкул на сайце БАЖ

See more news

Павел Сапелка — пра суд над экс-байцом беларускага САХРа ў Швейцарыі: «Любы вынік будзе на карысць справядлівасці»
25 September 2023, 11:11 AM
Павел Сапелка — пра суд над экс-байцом беларускага САХРа ў Швейцарыі: «Любы вынік будзе на карысць справядлівасці»
У судзе кантона Санкт-Гален у Швейцарыі 19 верасня пачалі судзіць экс-байца беларускага САХРа Юрыя Гараўскага, які ў 2019 годзе публічна заявіў аб сваёй датычнасці да выкрадання апазіцыйных палітыкаў.
Праваабаронца Алесь Бяляцкі ўганараваны «Залатымі лаўрамі»
25 September 2023, 11:04 AM
Праваабаронца Алесь Бяляцкі ўганараваны «Залатымі лаўрамі»
У Палацы Прымаса (Pałac Prymasowski) у Варшаве 19 верасня адбылося ўручэнне прэміі “Złoty Laur – 2023” (Залатыя лаўры), якая прысвойваюцца асобам, установам і кампаніям за іх выдатную грамадскую і сацыяльна-культурную дзейнасць.
«Указ зʼёсць часткай наўмыснай палітыкі пакарання беларусаў у выгнанні». ААН выступіла з заявай з нагоды новых пашпартных абмежаванняў
25 September 2023, 11:01 AM
«Указ зʼёсць часткай наўмыснай палітыкі пакарання беларусаў у выгнанні». ААН выступіла з заявай з нагоды новых пашпартных абмежаванняў
Арганізацыя Абʼяднаных Нацый 20 верасня выступіла з заявай з нагоды забароны на выдачу беларускіх пашпартоў за мяжой.
Комитет защиты журналистов выступил в поддержку «Беларусского расследовательского центра», признанного «экстремистской организацией»
25 September 2023, 10:34 AM
Комитет защиты журналистов выступил в поддержку «Беларусского расследовательского центра», признанного «экстремистской организацией»
Власти Беларуси должны прекратить использовать законодательство страны об экстремизме, чтобы заглушить голоса независимых СМИ и должны позволить им работать свободно, заявил Комитет защиты журналистов.

Атрымаць падтрымку

Мы б хацелі пачуць, як Беларускі Дом правоў чалавека можа падтрымаць вашу арганізацыю.

Аказаць падтрымку

Дому правоў чалавека імя Барыса Звозскава і яго дзейнасці