«Прысуд» паказвае, як Лукашэнка і яго атачэнне баяцца і ненавідзяць незалежных праўдзівых журналістаў і асабіста Дзяніса»

Парыж, 14 верасня 2022 г. – У адказ на тое, што суд у Беларусі прызнаў Дзяніса Івашына вінаватым і прысудзіў 13 гадоў і адзін месяц пазбаўлення волі за «дзяржаўную здраду» і «ўмяшанне ў дзейнасць праваахоўных органаў», Камітэт абароны журналістаў (CPJ) выступіў з заявай, якая асуджае пастанову суда:

«CPJ глыбока шакаваны выракам Дзяніса Івашына на 13 гадоў турмы. Абвінавачванні супраць яго цалкам сфабрыкаваныя і прызначаныя тэрарызаваць незалежных журналістаў, кабпазбавіць іх жадання працягваць сваю працу ў Беларусі», — заявіў у Нью-Ёрку Карлас Марцінес дэ ла Серна, праграмны дырэктар CPJ. «Беларускія ўлады павінны неадкладна вызваліць Дзяніса Івашына разам з усімі іншымі зняволенымі прадстаўнікамі прэсы».

Суд у сераду таксама аштрафаваў Івашына на 4800 рублёў (1900 долараў ЗША) і абавязаў яго выплаціць 18 000 рублёў (7130 долараў ЗША) у якасці «маральнай кампенсацыі» дзевяці неўстаноўленым асобам, у дзейнасць якіх ён нібыта ўмешваўся. Забароненая беларуская праваабарончая арганізацыя «Вясна» і жонка Дзяніса Вольга Івашына, якія звярнуліся да CPJ, дадалі, што зняволены журналіст плануе падаць апеляцыю на прысуд.

«Мы, вядома, не чакалі, што сістэма, якую рэжым [прэзідэнта Беларусі Аляксандра] Лукашэнкі стварыў на руінах судовай сістэмы, будзе справядлівай», — сказала Вольга Івашына CPJ. «Абвешчаны сёння так званы «прысуд» — гэта асабістая помста Дзянісу Івашыну за прынцыповую жыццёвую пазіцыю, журналісцкую дзейнасць і расследаванні. «Прысуд» фактычна паказвае, наколькі Лукашэнка і яго атачэнне баяцца і ненавідзяць незалежных праўдзівых журналістаў і асабіста Дзяніса».

Івашын — незалежны журналіст-расследавальнік незалежнага інфармацыйнага сайта «Новы час» і валанцёрскі рэдактар ​​беларускамоўнага сайта міжнароднага праекту расследаванняў InformNapalm. Яго затрымалі ў сакавіку 2021 года за рэпартаж пра былых украінскіх амапаўцаў, якія працуюць на беларускую міліцыю, і КДБ, беларуская служба бяспекі, абвінаваціла Івашына ў супрацоўніцтве з украінскай выведкай.

На 1 снежня 2021 года, калі CPJ праводзіў свой апошні перапіс турмаў, Беларусь была пятай у свеце найгоршай краінай для журналістаў: прынамсі 19 журналістаў знаходзяцца ў кратах.

Арыгінальны артыкул на сайце Камітэта абароны журналістаў

Пераклад на беларускую мову: БДПЧ