Еўрапарламент прыняў рэзалюцыю аб пераследзе беларусаў за мяжой

Дэпутаты Еўрапарламента трэцяга красавіка на пленарным пасяджэнні прынялі рэзалюцыю "Аб непасрэднай рызыцы далейшых рэпрэсій з боку рэжыму Лукашэнкі ў Беларусі – пагрозах ад Следчага камітэта", паведаміў Reform. Большасць дэпутатаў прагаласавалі за прыняцце рэзалюцыі.

Рэзалюцыя была ініцыяваная еўрадэпутатам Міхалам Кабоскам, намеснікам старшыні дэлегацыі Еўрапарламента па сувязях з Беларуссю, пасля звароту Паўла Латушкі, намесніка кіраўніка Аб'яднанага пераходнага кабінета і кіраўніка Народнага антыкрызіснага кіравання.

"Падчас маршу 23 сакавіка 2025 года ў Варшаве і ў наступныя дні да мяне звярнуліся беларусы, удзельнікі акцый за мяжой, з прапановай звярнуць увагу еўрапейскіх палітыкаў на злачынствы супраць беларусаў, якія пражываюць у краінах ЕЗ, што здзяйсняюцца рэжымам Лукашэнкі: крымінальныя справы, завочныя прысуды (так званая "спецвытворчасць"), шантаж, пагрозы, пераслед родных і блізкіх у Беларусі з боку спецслужбаў рэжыму, канфіскацыю маёмасці ды іншае", — адзначыў Павел Латушка.

У дакуменце разглядаецца "пераслед грамадзян Беларусі за іх мірную дэмакратычную дзейнасць за мяжой, як наўпроставае парушэнне тэрытарыяльнага суверэнітэту дзяржаў-чальцоў ЕС", а таксама "заклікае да агульнаеўрапейскай прававой падтрымкі і абароны беларусаў у выгнанні", у тым ліку тых, хто не мае магчымасці абнавіць дакументы, што сведчаць пра асобу, і супраць якіх ужываецца экстэрытарыяльны пераслед.

Дэпутаты Еўрапарламента заклікаюць Міжнародны крымінальны суд "паскорыць разгляд злачынстваў супраць чалавечнасці, учыненых рэжымам Лукашэнкі".

Прапануецца ўвесці "дадатковыя санкцыі, аналагічныя тым, якія ўжываюцца да Расіі, у прыватнасці супраць службовых асоб, адказных за транснацыянальныя рэпрэсіі".

Палітыкі таксама настойваюць на неабходнасці ўзмацнення палітычнай, фінансавай і тэхнічнай падтрымкі незалежных СМІ, праваабаронцаў і грамадзянскіх ініцыятыў.