IFEX: «Свет можа шмат чаму павучыцца ў БАЖ, у тым ліку еднасці і вынаходлівасці»
)
Намесніца выканаўчага дырэктара Міжнароднай асацыяцыі па абароне свабоды слова Рэйчэл Кей накіравала адмысловы ліст падтрымкі БАЖ і беларускім калегам.
— Гэты зварот я б хацела пачаць з цытаты доктара Марціна Лютэра Кінга. Хаця яе часта ўзгадваюць, яна такая ж моцная і актуальная сёння, як і тады, калі ён упершыню сказаў гэтыя словы:
«Несправядлівасць дзе-колечы – пагроза для справядлівасці паўсюль... Мы ведаем са шматпакутнага досведу, што свабода ніколі не даецца добраахвотна прыгнятальнікам; яе павінны патрабаваць прыгнечаныя».
Як глабальная сетка з больш чым 100 арганізацыямі-сябрамі, IFEX адданы прасоўванню і абароне фундаментальнага права на свабоду выказвання меркаванняў і інфармацыі. Мы хочам выказаць вам глыбокую ўдзячнасць за важную працу, якую вы робіце, і ваш значны ўнёсак у дасягненне гэтай мэты.
Нягледзячы на нападкі і велізарны ціск з боку ўладаў пасля выбараў 2020 года, БАЖ здолеў працягнуць сваю дзейнасць.
І без таго рэпрэсіўны клімат у Беларусі пагоршыўся яшчэ больш пасля расейскага ўварвання ва Украіну. Мы былі глыбока занепакоеныя тым, што сталі сведкамі хуткага скарачэння колькасці незалежных СМІ, узмацнення цкавання праз судовы пераслед арганізацый грамадзянскай супольнасці і ўзмацнення пераследу журналістаў, многія з якіх былі вымушаныя пакінуць свой дом.
Нягледзячы на ўсе цяжкасці, БАЖ застаецца ўзорам лідарства і ўстойлівасці. Трывалая і неацэнная праца БАЖ мае вялікае значэнне для барацьбы з звужэннем прасторы для грамадзянскага дзеяння і абмежаваннем свабоды выказвання.
Мы разумеем, якім высокім коштам гэта даецца. Падчас працы ў эміграцыі кіраўніцтва, супрацоўнікі і шараговыя сябры БАЖ зазнаюць фізічнае і эмацыйнае знясіленне, пакутуюць ад разлукі з сваімі сем’ямі і супольнасцю, а таксама адчуваюць бясконцую трывогу за бяспеку сваіх сем’яў і калегаў, якія засталіся ў краіне.
Свет можа шмат чаму павучыцца ў БАЖ, у тым ліку еднасці і вынаходлівасці, з якімі Асацыяцыя, як і раней, аддана бароніць свабоду слова і інфармацыі як краевугольнага каменя дэмакратыі.
У мінулым траўні IFEX з радасцю заўважыў заслужанае прызнанне гэтых намаганняў, калі БАЖ атрымаў Сусветную прэмію ЮНЕСКА за ўнёсак у справу свабоды прэсы.
Гэта ўзнагарода таксама стала прызнаннем той выключнай працы, якую вы робіце па маніторынгу, дакументаванні і падрыхтоўцы справаздачаў пра становішча са свабодай СМІ ў краіне. У той час калі дзяржаўныя ўлады поўныя рашучасці прымусіць беларускія галасы замаўчаць, вы прыкладаеце намаганні, каб яны гучалі і надалей.
Карыстаючыся выпадкам, хочам падкрэсліць, што БАЖ не самотны. Мы бачым хаўруснікаў, такіх як ПЭН Беларусь, якія прыкладаюць намаганні ў рамках больш шырокай кааліцыі. Таксама бачым падтрымку аднадумцаў з міжнароднай супольнасці.
І яшчэ раз заяўляем ад імя ўсёй сеткі IFEX пра поўную падтрымку вашай барацьбы за свабоду СМІ, бяспеку журналістаў і іншыя дэмакратычныя памкненні Беларусі.
З выказваннямі салідарнасці,
Рэйчэл Кей,
Намесніца выканаўчага дырэктара IFEX
Глядзiце таксама
)
)
)
)
Атрымаць падтрымку
