Тбіліскі Дом правоў чалавека вінавацяць у сабатажы і падтрымцы гвалту, яго рахункі заблакаваныя

Тбіліскі Дом правоў чалавека і арганізацыі, якія ўваходзяць у яго, выступілі з заявай аб блакаванні банкаўскіх рахункаў і пачатку крымінальнага пераследу праваабаронцаў.

Дом правоў чалавека вінавацяць у сабатажы, падтрымцы гвалту і дзеянняў супраць канстытуцыйнага ладу і нацыянальнай бяспекі. Падставай для такіх абвінавачванняў зрабілася аплата праваабарончымі арганізацыямі, якія ўваходзяць у склад Дома правоў чалавека ў Тбілісі, штрафаў, што спаганяюцца ўладамі з удзельнікаў мірных пратэстных сходаў.

На рахунках арганізацыі, якія былі замарожаныя на патрабаванне пракуратуры Грузіі, знаходзіліся ахвяраванні, сабраныя для пакрыцця штрафаў для фізічных асоб і гранты, якія пералічваюцца міжнароднымі донарамі на іншыя запланаваныя мерапрыемствы арганізацыі ў галіне правоў чалавека.

“Мы рэагуем на расследаванне, ініцыяванае Генеральнай пракуратурай "Грузінскай мары", у рамках якога былі замарожаныя банкаўскія рахункі некалькіх арганізацый і фондаў, у тым ліку Тбіліскага дома правоў чалавека (HRHT). Мы… атрымалі пастанову гарадскога суда па гэтым пытанні. Паводле нашай ацэнкі, як расследаванне, праведзенае пракуратурай, так і пастанова аб замарожванні рахункаў з'яўляюцца неабгрунтаванымі і незаконнымі. Гэта ўяўляе сабой яшчэ адну мэтанакіраваную атаку незаконнага рэжыму "Грузінскай мары" супраць праваабарончых арганізацый і праваабаронцаў, відавочна накіраваную на далейшае абмежаванне праваабарончай дзейнасці ў краіне”, – вядзецца ў заяве.