Заява аб прызнанні васьмі чалавек палітычнымі зняволенымі (Максім Гелясін і іншыя)

Сумесная заява прадстаўнікоў беларускай праваабарончай супольнасці

16 кастрычніка 2025 г.

У сувязі з новымі выпадкамі асуджэння і пазбаўлення волі грамадзянаў краіны па шэрагу дыфамацыйных артыкулаў Крымінальнага кодэкса Рэспублікі Беларусь, а таксама ў сувязі са знявагай дзяржаўных сімвалаў Рэспублікі Беларусь ды і іншымі дзеяннямі, накіраванымі на правамерную реалізацыю свабоды выказвання меркаванняў, мы, прадстаўнікі беларускай праваабарончай супольнасці патрабуем спыніць пераслед правамерных форм выказвання меркаванняў, і ў  чарговы раз пацвярджаючы свае неаднаразова выказаныя патрабаванні па дэкрыміналізацыі дыфамацыі і недапушчальнасці пазбаўлення волі грамадзян за абразу службовых асобаў, дзяржавы, дзяржаўных органаў і сімвалаў (супольная заява ад 22 снежня 2020 г.),  адзначаем наступнае:

Намі атрыманая інфармацыя пра наступных асобаў, пазбаўленых волі за абразу А. Лукашэнкі і іншыя формы мірнай рэалізацыі свабоды мяркаванняў:

Максім Гелясін асуджаны па арт. 361 Крымінальнага кодэкса па абвінавачанні ў “закліках да дзеянняў, скіраваных на прычыненне шкоды нацыянальнай бяспецы Рэспублікі Беларусь” да пазбаўлення волі;

Аляксандр Старасцін асуджаны па арт. 367 КК па абвінавачванні ў паклёпе на А. Лукашэнку да 1 года 6 месяцаў пазбаўлення волі;

Андрэй Нехвядовіч асуджаны па арт. 361 і 368 КК па абвінавачанні ў “закліках да дзеянняў, скіраваных на прычыненне шкоды нацыянальнай бяспецы Рэспублікі Беларусь” і абразе А. Лукашэнкі да пазбаўлення волі;

Сяргей Зініч асуджаны па арт.367 КК па абвінавачванні ў паклёпе на А. Лукашэнку да 4 гадоў абмежавання волі з накіраваннем у папраўчую ўстанову адкрытага тыпу, адбывае пакаранне;

Сяргей Міцюшкін змешчаны пад варту па арт. 188 КК за паклёп;

Аляксей Развадоўскі асуджаны па арт. 367 і 368 КК па абвінавачанні ў абразе А. Лукашэнкі і паклёпе на яго да 3 гадоў пазбаўлення волі;

Альберт Шыла асуджаны па арт. 368 і 369 КК па абвінавачанні ў абразе А. Лукашэнкі і прадстаўніка ўлады да пазбаўлення волі;

Сяргей Пяткевіч асуджаны па арт. 361 Крымінальнага кодэкса па абвінавачанні ў “закліках да дзеянняў, скіраваных на прычыненне шкоды нацыянальнай бяспецы Рэспублікі Беларусь” да пазбаўлення волі;

Мы лічым пераслед і пазбаўленне волі названых асоб палітычна матываваным, звязаным з мірнай рэалізацыяй выказвання меркавання, а іх саміх палітычнымі зняволенымі ў адпаведнасці з п. 3.1(а) Кіраўніцтва па вызначэнні паняцця “Палітычны зняволены”, і патрабуем ад уладаў Беларусі:

• Неадкладна вызваліць палітвязняў Максіма Гелясіна, Аляксандра Старасціна, Андрэя Нехвядовіча, Сяргея Зініча, Сяргея Міцюшкіна, Аляксея Развадоўскага, Альберта Шыла, Сяргея Пяткевіча і спыніць крымінальны пераслед у дачыненні да іх.

• Прыняць захады, скіраваныя на дэкрыміналізацыю дыфамацыйных правапарушэнняў і адмену артыкулаў Крымінальнага кодэкса, якія прадугледжваюць адказнасць за абразу дзяржавы, дзяржаўных сімвалаў і службовых асобаў, а менавіта – арт. 188, 361, 367, 368, 369, 369-1, 370, 391 Крымінальнага кодэкса Рэспублікі Беларусь, і спыніць усе раней узбуджаныя па дадзеных артыкулах крымінальныя справы.

• Неадкладна вызваліць усіх палітычных зняволеных і спыніць палітычныя рэпрэсіі супраць грамадзян краіны.

Праваабарончы цэнтр "Вясна";

Lawtrend;

Respect-Protect-Fulfill;

Беларускі ПЭН;

Прававая ініцыятыва;

Беларускі Хельсінкскі Камітэт;

Беларускі дом правоў чалавека імя Барыса Звозскава.