Праваабаронцы «Вясны» зьвярнуліся да спэцдакладчыкаў ААН з нагоды прызнаньня арганізацыі «экстрэмісцкім фармаваннем»

Юрыдычная служба «Вясны» накіравала зварот ва Упраўленьне Вярхоўнага камісара па правах чалавека з нагоды прызнаньня праваабарончага цэнтру «экстрэмісцкім фармаваньнем».

Праваабаронцы зьвярнуліся да Спэцдакладчыка аб стане правоў чалавека ў Беларусі, Спэцдакладчыка аб палажэньні праваабаронцаў, Спэцдакладчыка аб ухваленьні і абароне права на свабоду меркаваньняў, а таксама да Спэцдакладчыка аб свабодзе мірных сходаў і аб’яднаньняў.

Камэнтар юрысткі «Вясны» Сьвятланы Галаўнёвай:

«Пастанова аб прызнаньні «Вясны» «экстрэмісцкім фармаваньнем» крыміналізуе і забараняе ўсю дзейнасьць арганізацыі, як да моманту прызнаньня, так і пасьля. Гэта цягне за сабой сур’ёзныя парушэньні правоў і рызыкі як для праваабаронцаў, так і для людзей, якія шукаюць дапамогі праваабаронцаў. У звароце да спэцдакладчыкаў мне было важна паказаць, што дзеяньні ўладаў накіраваныя ня толькі на арганізацыю, але і на тых, каму яна дапамагала і дапамагае. Гэта спроба запалохаць, спроба пераканаць, што маўчаньне і нядзеяньне — адзіная бясьпечная стратэгія паводзінаў.

Таму важна казаць, што прызнаньне «Вясны» «экстрэмісцкім фармаваньнем» — гэта ня толькі парушэньне свабоды асацыяцыі і перасьлед за легальную праваабарончую дзейнасьць, але і недапушчальнае ўмяшаньне ў свабоду шукаць, атрымліваць і распаўсюджваць усялякага роду інфармацыю».

23 жніўня Міністэрства ўнутраных справаў Рэспублікі Беларусь прыняло пастанову аб прызнаньні Праваабарончага цэнтра «Вясна» «экстрэмісцкім фармаваньнем». У «Пералік арганізацыяў, фармаваньняў, індывідуальных прадпрымальнікаў, якія маюць дачыненьне да экстрэмісцкай дзейнасьці» дадалі сайты spring96.org і freeviasna.org, тэлеграм-каналы, старонкі ў сацыяльных сетках «Вясны», агульныя тэлеграм-акаунты і электронныя пошты для сувязі з праваабаронцамі, патрэон, фотабанк на flicr.com, а таксама асабістыя пошты і тэлеграм-акаунты — усяго каля сотні пазыцыяў.