Прадстаўнікі журналісцкіх арганізацый Афрыкі запатрабавалі вызвалення беларускіх калег

Крыніца: Беларуская асацыяцыя журналістаў

Прадстаўнікі кантынентальнай сеткі AFEX па свабодзе слова і правах медыя ў Афрыцы далучыліся да Марафону салідарнасці са зняволенымі беларускімі журналістамі.

Журналісты з Афрыкі Падчас з’езду глабальнай сусветнай сеткі за свабоду выказвання IFEX у Берліне. Красавік 2024 года. Фота: БАЖ

У гэтыя дні ў Берліне праходзіць з’езд Міжнароднай асацыяцыі абароны свабоды слова IFEX, якая ўключае ў сябе больш за 80 арганізацый з 60 краін свету. У сходзе прадстаўнікоў гэтай глабальнай сусветнай сеткі за свабоду выказвання бралі ўдзел і прадстаўнікі Беларускай асацыяцыі журналістаў.

Падчас мерапрыемстваў у Берліне , калегі з Афрыкі ўзялі удзел у акцыі салідарнасці са зняволенымі журналістамі і журналісткамі ў Беларусі, запатрабаваўшы іх неадкладнага вызвалення.

— Медыйшчыкам з Беларусі важна ведаць, што іх праблемы турбуюць не толькі іх саміх, але і калег па ўсім свеце. У розных кутках свету ведаюць пра дыктатарскі рэжым Лукашэнкі, пераслед незалежных журналістаў, вайну супраць свабоды выказвання ў Беларусі і падтрымліваюць голас БАЖ і дэмакратычных арганізацый з патрабаваннем неадкладна вызваліць журналістаў, — адзначылі прадстаўнікі кантынентальнай сеткі AFEX.

БАЖ заклікае калег ва ўсім свеце падтрымаць акцыю салідарнасці! Вы можаце раздрукаваць партрэты зняволеных калег, сфатаграфавацца з імі ў пазнавальных месцах вашага горада (не ў Беларусі) і апублікаваць у сацыяльных сетках з тэгамі #СвабодуЖурналістам і #BecauseTheJournalist, а таксама даслаць нам на адрас office@baj.media ці intercomm@baj.media.